ევროპის საბჭოს საპარლამენტო ასამბლეის (PACE) 20 წევრი ექსპრეზიდენტ მიხეილ სააკაშვილის ჯანმრთელობის მდგომარეობის, ასევე, უკრაინისა და საქართველოს სახალხო დამცველების რეკომენდაციების შეუსრულებლობის გამო შეშფოთებას გამოთქვამს.

რატომ არის მნიშვნელოვანი: სააკაშვილის ოჯახის წევრები და ადვოკატები ამბობენ, რომ მისი ჯანმრთელობის მდგომარეობა მძიმეა.

  • ისინი ექსპრეზიდენტის უცხოეთში სამკურნალოდ გადაყვანას ითხოვენ.

დეტალები: ასამბლეის წევრები აცხადებენ, რომ სააკაშვილს სასწრაფოდ სჭირდება თანამედროვე კლინიკაში გადაყვანა, სტრესის გამომწვევი ფაქტორებისგან თავისუფალი გარემოში სამკურნალოდ.

  • "მოვუწოდებთ საქართველოს მთავრობას, რომ ყველაფერი გააკეთოს მისი შესაძლებლობების ფარგლებში, რათა სააკაშვილის ჯანმრთელობის მდგომარეობა დასტაბილურდეს".
  • "მნიშვნელოვანი იქნებოდა მკურნალობა ევროპულ სპეციალიზებულ კლინიკაში, რომელსაც უკვე აქვს მსგავსი შემთხვევების გამოცდილება. ეს, უპირველეს ყოვლისა, ჰუმანიტარული საკითხია".

გარდა ამისა, PACE-ის წევრები შეშფოთებას გამოთქვამენ საქართველოში დემოკრატიის არასტაბილურობის გამო და აცხადებენ, რომ საზოგადოებაში ისედაც ღრმა განხეთქილება კიდევ უფრო გაღრმავდება.

  • "საქართველოს სასწრაფოდ სჭირდება პოლიტიკური შერიგების პროცესი. პატიმრობის შედეგად სააკაშვილის მძიმედ დაავადებამ ან გარდაცვალებამ, შესაძლოა, ამ პროცესს ზიანი მოუტანოს".