შს მინისტრის მოადგილის, შალვა ხუციშვილის თქმით, იური ლუჟკოვი ე.წ. შავ სიაში იქნება შეყვანილი და ის საქართველოში ვეღარ შემოვა. ამის შესახებ შსს-ს პრესსამსახური ავრცელებს ინფორმაციას:

"ამ ეტაზე რაც მოხდა, განპირობებული იყო იმით, რომ თავის დროზე არ იყო შეყვანილი სიაში. ჩვენ შევიყვანთ მას ამ სიაში და საქართველოში ვეღარ შემოვა".

მოსკოვის ყოფილი მერი იური ლუჟკოვი საქართველოში ოთხი დღის განმავლობაში იმყოფებოდა. მან საზღვარი უპრობლემოდ გადმოკვეთა.

საზოგადოებრივ მაუწყებელთან ექსკლუზიური ინტერვიუს დროს, ლუჟკოვმა საქართველოს ტერიტორიული მთლიანობის საწინააღმდეგო განცხადება გააკეთა:

"მე მაინც ვფიქრობ, რომ აფხაზეთი სხვა ქვეყანაა, ეს სულ სხვა ხალხია. ასეა ოსეთიც. ბუნებრივია, არსებობს გარკვეული ნოსტალგია და ბრაზი, მაგრამ ვფიქრობ, საქართველო, ამ რეგიონების ჩამოშორების შემდეგ, მომავალში უკეთ იგრძნობს თავს".

ლუჟკოვს დარღვეული აქვს საქართველოს კანონი ოკუპაციის შესახებ და ის საქართველოს ოკუპირებულ რეგიონებში რუსეთის მხრიდანაა ნამყოფი.

ამაზე საუბრისას, ლუჟკოვი აცხადებს, რომ კანონის შესახებ სმენია, თუმცა საზღვარი უპრობლემოდ გადმოკვეთა, მისი დოკუმენტაცია კი "წესების შესაბამისად" შემოწმდა.