საუდის არაბეთის ხელისუფლების გადაწყვეტილებით, სათამაშოები და საბავშვო ტანსაცმელი ცისარტყელას ფერებში "ჰომოსექსუალობის წახალისების" გამო გაყიდვიდან ამოიღეს.

ადგილობრივი მედიის ცნობით, საშინაო ვაჭრობის სამინისტროს წარმომადგენლებმა დედაქალაქ ერ-რიადში მდებარე მაღაზიებიდან სხვადასხვა დასახელების პროდუქტი ამოიღეს, მათ შორის, თმის სამაგრები, "პოპ-იტები", მაისურები, ქუდები და პენალები.

უწყების ერთ-ერთი წარმომადგენლის თქმით, ეს ნივთები "ისლამურ რწმენასა და საზოგადოებრივ მორალს უპირისპირდება", ამასთან, "ეწევა ჰომოსექსუალური ფერების პროპაგანდას ახალგაზრდა თაობაში".

თავის მხრივ, სამინისტრომ ტვიტერზე გამოაქვეყნა განცხადება და აღნიშნა, რომ მათმა თანამშრომლებმა იმ კონკრეტული სიმბოლოებისა და ნიშნების მქონე პროდუქტები ამოიღეს გაყიდვიდან, რომლებიც "საღ აზრს" ეწინააღმდეგება. ამდენად, ნივთების გამყიდველი ობიექტები დაჯარიმდებიან.

რამდენიმე თვის წინ, საუდის არაბეთის მეზობელ კატარშიც მსგავსი ზომები მიიღეს — მაღაზიებში იმ სათამაშოების გაყიდვა აიკრძალა, რომლებიც "ისლამურ ღირებულებებს უპირისპირდებოდა".

ისლამური კანონის ქვეყანაში დამკვიდრებული წესით, ჰომოსექსუალური სქესობრივი ურთიერთობის მქონე პირი სიკვდილით ან გამათრახებით ისჯება — სასჯელის ზომა "დანაშაულის სერიოზულობაზეა" დამოკიდებული. ამასთან, ქვეყანაში კაცებს "ქალივით მოქცევა" ან ქალის სამოსის ტარება ეკრძალებათ — ასევე პირიქით. აკრძალულია ონლაინ ქმედებაც, რომელიც "რელიგიურ ღირებულებებებსა და საზოგადოებრივ მორალს" ეწინააღმდეგება.

აპრილის თვეში, საუდის არაბეთში Doctor Strange in the Multiverse of Madness-ის კინოთეატრებში ჩვენებაც აკრძალეს, რადგან დისნეიმ "ლგბტქ სცენების" ამოჭრის თხოვნაზე უარით უპასუხა. ამავე მოტივით ქვეყანაში ასევე აიკრძალა ახალი ფილმი Lightyear.