როცა პეკინის გამზირზე, ბახტრიონის ქუჩის კუთხეში მდებარე ძველ სახლს ჩაუვლით ქვეშ აფთიაქით, სახლს, რომელიც თითქოს, უხსოვარი დროიდან აქ დგას, ზევით ახედვა არ დაგავიწყდეთ – ღირს. სახლი სულ ცოტათი, მაგრამ მაინც, თავის თავს აღარ ჰგავს. პირველიდან ბოლო სართულამდე, ყოველი მხრიდან, აივნებზე ქოთნებია გადმოკიდებული. სუროს სიხასხასეს, ლავანდის სურნელს და პეტუნიების სიყვითლეს ქვემოდან კარგად ვერ არჩევ, მაგრამ ფაქტია – ხედი შეცვლილია. ურბანული პრობლემებით გადაჭედილ თბილისში ეს ცხადია ზღვაში წვეთია. თუმცა „ინდიგომ“ გადაწყვიტა, სწორედ ზღვაში წვეთით დაიწყოს – შეცვალოს თუნდაც ერთი სახლის ფასადი და ასეთივე ცვლილებების დასაწყებად, ჟურნალში ჩადებული ყვავილების თესლების სახით, შანსი მკითხველსაც მისცეს.

„დაიწყე შენი აივნით“, „შეცვალე ხედი“ – ყვავილებისა და ცვლილებების ეს ახალი კამპანია თბილისში ამ სლოგანებით მიმდინარეობს და ის „ინდიგოსა“ და კომპანია „ლისი დეველოპმენტის“ ერთობლივ პროექტს წარმოადგენს. „ლისი დეველოპმენტი“ წლებია ზრუნავს გარემოსა და ეკოლოგიურ სისუფთავეზე. ბოლო წლების განმავლობაში მხოლოდ ლისის ტბის გარშემო კომპანიის მიერ 10 ათასზე მეტი ხეა დარგული. წინა წლიდან „ლისი დეველოპმენტმა“ უკვე აქტიურად დაიწყო სოციალური პასუხისმგებლობის აღება და ძალიან მალე შემოგვთავაზებს სიახლეებს ამ მიმართულებით. ამ შემთხვევაში, პროექტში ჩასართავად სწორედ იდეური თანხვედრა იყო გადამწყვეტი, გარეგნულ, საინტერესო ფორმასთან ერთად: „კომპანიისთვის ძალიან მნიშვნელოვანი იყო ამ პროექტში ჩართვა, რადგან სოციალური პასუხისმგებლობა ჩვენთვის ერთ-ერთი მთავარი მიმართულებაა, განსაკუთრების ბოლო ორი წელია. ჩვენი მთავარი კონცეფციაა 80/20-ზე, რაც გულისხმობს იმას, რომ ჩვენი კუთვნილი ტერიტორიის 80%-ს ყოველთვის ვიყენებთ გამწვანებისთვის, პარკებისა და დამატებითი ინფრასტრუქტურისთვის და მხოლოდ 20%-ს ვუთმობთ მშენებლობას. აქედან გამომდინარე, მივესალმებით ყველა ინიციატივას, რომელიც ქალაქზე ზრუნვას და ეკოლოგიის გაუმჯობესებას ეხება“, – ამბობს „ლისი დეველოპმენტის“ მარკეტინგის დირექტორი, მარიამ ოსეფაშვილი.

#19 „ინდიგოს“, რომელიც მაისის ბოლომდე გაიყიდება, მოჰყვება რამდენიმე სხვადასხვა ყვავილის თესლი შესაბამისი ინსტრუქციით, რაც ნებისმიერ მსურველს ყვავილების დათესვას გაუადვილებს. ამ პროექტის მხარდამჭერი საქართველოს ეროვნული ბოტანიკური ბაღია და ეს პირველი შემთხვევაა, როცა ბოტანიკურ ბაღში დაცული ყვავილები ქალაქში ასე მასობრივად ვრცელდება.

„ინდიგოს“ დამფუძნებლისა და გაყიდვების დირექტორის, თინა ოსეფაშვილის თქმით, ეს მხოლოდ საპილოტე კამპანიაა. „ინდიგო“ კი უკვე ახალი სახლის არჩევას იწყებს ცვლილებების მუხტისა და ყვავილების გასავრცელებლად და კამპანიის დახვეწასა და განვითარებაზე ფიქრობს. მხოლოდ გამომცემლობა, მხოლოდ ბეჭდური ჟურნალი „ინდიგო“ თავიდანვე არ ყოფილა, თუმცა მისი მთავარი იდეა – გაიშალოს და შეხვდეს ადამიანებს სამ სხვადასხვა პლატფორმაზე – ბეჭდურ, ონლაინ და რეალურ სივრცეში – ასე მასშტაბურად პირველად სწორედ ამ კამპანიით ხორციელდება.