რუს ბლოგერს, ინსა ლანდერს საქართველოში არ უშვებენ. ფონდის, თავისუფალი რუსეთის ხელმძღვანელი, იგორ კუროპტევი ფორმულასთან აცხადებს, რომ მას არ აქვს წყალი, საჭმელი და სძინავს სკამზე.

რატომ არის მნიშვნელოვანი: ბლოგერს რუსეთში შინაპატიმრობა ჰქონდა მისჯილი. კუროპტევის ცნობით, ის გაიქცა და რუსეთის საზღვარი გადმოლახა.

  • "რუსეთში დაბრუნება რომ სცადოს, მაშინვე საზღვარზე დაიჭერენ და მრავალი წლის გატარება მოუწევს ციხეში. მიმართა ყველა სამინისტროს, მაგრამ არავინ გამოეხმაურა", — თქვა მან.

ვინ არის ინსა ლანდერი: OVD Info-ს ცნობით, რუსი ბლოგერი თვეების განმავლობაში გამოძიებას ატარებდა ერთ-ერთ მაღალჩინოსანსა და საქველმოქმედო ფონდიდან თანხის გაჟონვაზე.

  • წინასწარი ინფორმაციით, მას ბრალი ტერორისტული საქმიანობისთვის დახმარებისთვის ედება, თუმცა OVD Info-ს განცხადებით, რეალურად გამოძიება ტერორისტული აქტის მუხლით მიმდინარეობს.
  • ლანდერს შინაპატიმრობა 2022 წლის თებერვალში შეუფარდეს. მედია მასზე დაყრდნობით წერს, რომ გამომძიებლები მასზე ზეწოლას ცდილობდნენ და თუ დანაშაულს აღიარებდა, გაათავისუფლებდნენ.

შსს ამბობს, რომ რუს ბლოგერს საქართველოში შემოსვლაზე უარი 12 ივნისს უცხოელთა და მოქალაქეობის არმქონე პირთა სამართლებრივი მდგომარეობის შესახებ საქართველოს კანონის მე-11 მუხლის საფუძველზე ეთქვა.

  • "ვინაიდან იგი იძლეოდა აშკარად ცრუ და ურთიერთსაწინააღმდეგო ინფორმაციას თავისი ვიზიტის მიზნების შესახებ, რაზეც შედგა შესაბამისი სამართლებრივი დოკუმენტი და ჩაბარდა კანონით დადგენილი წესით";
  • "მეორე დღეს, 13 ივნისს, აღნიშნული მოქალაქე კვლავ გამოცხადდა დარიალის სასაზღვრო გამშვებ პუნქტზე და მოითხოვა საერთაშორისო დაცვა".

ბრალდება: როგორც შინაგან საქმეთა სამინისტრო ინსა ლანდერზე დაყრდნობით წერს, მან დაარღვია შინაპატიმრობის წესები, მოიხსნა ე.წ. სამაჯური და საპასპორტო კონტროლის გავლის შემდგომ აპირებდა საქართველოში შემოსვლას.

  • "აღსანიშნავია, რომ მასობრივი ინფორმაციის წყაროებიდან ნამდვილად იკვეთება, რომ აღნიშნული პიროვნება არის ბრალდებული ისეთ მძიმე საერთაშორისო დანაშაულში, როგორიც არის ტერორისტულ ორგანიზაციასთან თანამშრომლობა".

საქართველოს კანონმდებლობის მიხედვით, უცხოელის საქართველოს ტერიტორიაზე შემოსვლის საკითხი თანხვედრაში უნდა იყოს საზღვრის კვეთის შესაბამის მოთხოვნებთან.

  • შსს ამბობს, რომ თუკი პირი ვერ აკმაყოფილებს საქართველოს კანონმდებლობით დადგენილ კრიტერიუმებს, ასეთ პირს საქართველოში შემოსვლაზე შეიძლება უარი ეთქვას სახელმწიფო ინტერესის გათვალისწინებით.

ადგილზე ჩავიდნენ სახალხო დამცველის წარმომადგენლებიც. როგორც ომბუდსმენის აპარატში On.ge-ს განუცხადეს, რუსეთის მოქალაქესთან შეხვედრა ვერ მოხერხდა და გრძელდება საქმის შესწავლა.

ლიეტუვა მზადაა, რომ ინსა ლანდერი ვილნიუსში გადაიყვანოს. ამის შესახებ ლიეტუვის ელჩმა საქართველოში ანდრიუს კალინდრამ ისაუბრა.