ქართული ოცნების თავმჯდომარის, ირაკლი კობახიძის განცხადებით, ევროკომისიამ და ევროსაბჭომ, რომ გაიმეოროს ის, რაც ევროპარლამენტის რეზოლუციაში წერია, იქნება "ძალიან მძიმედ მისაღები". მისი თმით, სანამ ომი გრძელდება უკრაინაში, "პატარა უხერხულობები გვექნება პარტნიორებთან".

"თეორიულად, ასეთი რამ რომ გაიმეოროს კომისიამ და საბჭომ, რომ აგერ გაუშვით სააკაშვილი და გვარამია და სანქციებზე ვიფიქროთ ბიძინა ივანიშვილის წინააღმდეგ. რა თქმა უნდა, თეორიულად ამაზე რომ ვიმსჯელოთ, ჩვენი მხრიდან ამას ბუნებრივია, ექნება ძალიან მძიმე რეაქცია და ასევე იმაზე უნდა ვიმსჯელოთ, რა შეიძლება იყოს ამ ყველაფრის მიზეზი. ევროპარლამენტი კიდე ევროპარლამენტია, მაგრამ აღმასრულებელმა სტრუქტურებმა ამ მიმართულებით თუნდაც ამის მეათედი რომ თქვან, ჩვენთვის ეს იქნება ძალიან მძიმედ მისაღები და ობიექტურად იქნება მძიმედ მისაღები.

ზოგადა, ერთ რამეს ვიტყვი, რომ ვიდრე ომი გრძელდება უკრაინაში, მანამდე ასეთი პატარა უხერხულობები ჩვენ გვექნება ჩვენს პარტნიორებთან, თუმცა როგორც კი ეს ომი დასრულდება უკრაინაში, მე დარწმუნებული ვარ, რომ ყველა ყველაფერს შეაფასებს და მათ შორის შეაფასებს და დააფასებს იმასაც, რომ ჩვენ ჩვენი პატარა ქვეყანა დავიცავით და არ გავწირეთ განადგურებისთვის ძალიან მარტივად და პირდაპირ რომ ითქვას", — ამბობს კობახიძე იმედის ეთერში.

ევროპარლამენტმა საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუცია მიიღო, რომელსაც მხარი 308 დეპუტატმა დაუჭირა. წინააღმდეგი 218 იყო.

8 ივნისს ევროპარლამენტში ამ საკითხზე დებატები გაიმართა. ევროპარლამენტარებმა საქართველოში მედიაგარემო კრიტიკულად შეაფასეს და შეშფოთება გამოხატეს მთავრობის დამოკიდებულებებზე, რაც რეზოლუციაში დაწვრილებით აისახა.

ევროპარლამენტის პოლიტიკური ჯგუფების განცხადებაში კი ევროკავშირის წევრობის კანდიდატის სტატუსზეა საუბარი, საქართველო მოლდოვასა და უკრაინისგან გამიჯნულად არის ნახსენები და აღნიშნულია, რომ ევროკავშირმა საქართველოსთვის იმავე სტატუსის მინიჭებაზე უნდა იმუშავოს.