ცნობილი ინგლისელი მომღერალი ჰარი სტაილსი ჰოლივუდურ კარიერას განაგრძობს და ამჯერად ახალ ფილმში იღებს მონაწილეობას, სადაც სასიყვარულო სამკუთხედის ცენტრში მყოფ გეი პოლიციელის როლს ასრულებს.

ფილმში, სახელად My Policeman (ჩემი პოლიციელი) მოქმედება გასული საუკუნის 50-იან წლებში ხდება. ნაწარმოები ბეთან რობერტსის ამავე სახელწოდების რომანს ეფუძნება. მისი მთავარი პერსონაჟი ტომ ბერჯესია, რომელსაც თავის ცოლთან და მუზეუმის კურატორთან რთული ურთიერთობა აკავშირებს.

სტაილსის პერსონაჟი რიგითი პოლიციელია, რომელიც თავის სექსუალობას სკოლის მასწავლებელთან, მერიონთან, ურთიერთობით მალავს. ბერჯესს საიდუმლო კავშირი აქვს მუზეუმის თანამშრომელ პატრიკთანაც, თუმცა, მერიონთან ქორწინება ორივე ურთიერთობას ხელს უშლის. ფილმში ორი სიუჟეტური ხაზი ვითარდება: ერთი 1950-იან წლებში, მეორე კი — 1990-იანებში.

ფოტო: Amazon

კინოსურათისთვის სცენარი რონ ნაისვეინერმა დაწერა, აღმასრულებელი პროდიუსერი კი მაიკლ გრენდეჯი გახლავთ. როგორც ცნობილია, ფილმის გადაღებას მთელი 8 წელი დასჭირდა. ერთი-ერთი პროდიუსერის, რობი როჯერსის თქმით, მათ ყველა ეუბნებოდა რომ "ეს რთული საქმე იქნებოდა" ან "ფილმს არავინ უყურებდა".

ჩემი პოლიციელის პრემიერა კინოთეატრებში 21 ოქტომბერს შედგება, Amazon Prime Video-ის მომხმარებლები კი ფილმს 4 ნოემბრიდან იხილავენ.