ნარნიას ქრონიკები ფენტეზის ჟანრის ფილმების სერიაა, რომელიც მწერალ კლაივ ლუისის ამავე სახელწოდების რომანების სერიას ეფუძნება.

ფილმები სტუდია Walden Media-მ გადაიღო და ამ დროისთვის სულ სამი ფილმი: ნარნიას ქრონიკები: ლომი, ალქაჯი და ჯადოსნური კარადა (2005), ნარნიას ქრონიკები: პრინცი კასპიანი და ნარნიას ქრონიკები: განთიადის დამპყრობლის მოგზაურობა (2010) არის გადაღებული.

ფილმებში, ისევე როგორც წიგნის სერიებში, მოთხრობილია და-ძმების, პევენსის ოჯახის მოგზაურობა გამოგონილ სამყარო ნარნიაში, რომელსაც მოლაპარაკე ლომი და ქვეყნის ნამდვილი მეფე მართავს.

ფილმების ამ სერიის პირველი ორი ნაწილის რეჟისორი ენდრიუ ადამსონია, ხოლო მესამე ფილმის - მაიკლ ეპტედი.

ეკრანიზაციების პირველი ფილმი ნარნიას ქრონიკები: ლომი, ალქაჯი და ჯადოსნური კარადა კომერციულად წარმატებული აღმოჩნდა და ყველა დროის ყველაზე შემოსავლიანი ფილმების სიის 38-ე ადგილზეც მოექცა, თუმცა იგივე წარმატებით ვერ ისარგებლა მეორე ფილმმა.

ნარნიას ქრონიკების პირველმა ორმა ფილმმა შემქმნელებს $1 მილიარდი შემოუტანეს და ყველა დროის ყველაზე შემოსავლიან ფილმთა სერიების სიაში მე-17 ადგილს იკავებენ.

აღსანიშნავია, რომ ავტორი კლაივ ლუისი წინააღმდეგი იყო წიგნის მიხედვით მისი ეკრანიზაცია გადაეღოთ. "არ მინდა ნარნია ახალი მიკი მაუსი გახდეს", - ამბობდა ლუისი, ჯერ კიდევ 50-60-იან წლებში, როდესაც ტელევიზია ძალას იკრებდა. თუმცა მისი გარდაცვალებიდან რამდენიმე ათეული წლის შემდეგ მისმა შთამომავლებმა Walden Media-ს წარმომადგენლებთან რამდენიმე შეხვედრა გამართეს და საბოლოოდ მიიღეს გადაწყვეტილება, რომ მაყურებელს აუცილებლად უნდა ენახა ნარნიას ქრონიკები დიდ ეკრანზე.

ვიდრე სტუდია რეჟისორ ენდრიუ ადამსონს ფილმის გადაღებას დაავალებდა, მათ ეკრანიზაციის გადაღება გილერმო დელ ტოროს სთხოვეს. თავდაპირველად, დელ ტორო შეთავაზებას დასთანხმდა, თუმცა სცენარში რამდენიმე ცვლილების შეტანა სურდა, რაც სტუდიისთვის მიუღებელი აღმოჩნდა, ამიტომ მას კონტრაქტზე უარი უთხრეს.

კვირას, 14 მაისს, ტელეკომპანია GDS-ზე ჯადოსნურ თავგადასავლების დროა, 16:30 საათზე თქვენ ნარნიას ქრონიკები: ლომი, ალქაჯი და ჯადოსნური კარადა შეგიძლიათ ნახოთ, ხოლო 19:30 საათზე ნარნიას ქრონიკები: პრინცი კასპიანი.