ქართული ოცნების დეპუტატი ალუდა ღუდუშაური ევროპარლამენტის მიერ მიღებულ დოკუმენტს არაობიექტურს უწოდებს და ფიქრობს, რომ რეზოლუციას, რომელშიც ბიძინა ივანიშვილის სანქცირებაზეა საუბარი, "ნულის ფასი აქვს".

"ამ რეზოლუციას არაფერი არ აქვს საერთო ობიექტურობასთან, არც სამართლიანობასთან და ის, რაც არის არაობიექტური, არასამართლიანი, ბუნებრივია, ეს ვერ იქნება მოქმედებაში მოყვანილი. ამიტომ, ამ რეზოლუციას, რომელიც ეხება განსაკუთრებით, ბატონი ივანიშვილის თითქოსდა რამე სანქცირებას, ამას აქვს ნოლის ფასი, ეს დაიმახსოვრეთ კარგად", — ამბობს ის.

ევროპარლამენტმა საქართველოში მედიის თავისუფლების დარღვევებისა და ჟურნალისტების უსაფრთხოების გამოწვევების შესახებ რეზოლუცია მიიღო, რომელსაც მხარი 308 დეპუტატმა დაუჭირა. წინააღმდეგი 218 იყო.

8 ივნისს ევროპარლამენტში ამ საკითხზე დებატები გაიმართა. ევროპარლამენტარებმა საქართველოში მედიაგარემო კრიტიკულად შეაფასეს და შეშფოთება გამოხატეს მთავრობის დამოკიდებულებებზე, რაც რეზოლუციაში დაწვრილებით აისახა.

ტექსტის ერთ-ერთი ყველაზე მნიშვნელოვანი პუნქტი ქართული ოცნების დამფუძნებლის, ბიძინა ივანიშვილისთვის სანქციების დაწესების მოწოდებას და მის კრემლთან ურთიერთობას ეხება. რეზოლუცია საქართველოს მთავრობას ზოგადი პრინციპებისა და მოვალეობების დაცვისკენ მოუწოდებს, ამასთანავე მასში განხილულია კონკრეტული საკითხები, რაზეც ხელისუფლებას შესაბამისი რეაგირება უნდა ჰქონდეს, როგორიცაა 5 ივლისის, ნიკა გვარამიას და მიხეილ სააკაშვილის საქმეები.