კულტურის მინისტრის, თეა წულუკიანის განცხადებით, პრეზიდენტს ამ მოდელის პირობებში იმასთან დაკავშირებით, თუ ვინ იქნება უკეთესი ელჩი, სიტყვა არ ეთქმის, ამის საპირისპიროდ კი პრეზიდენტმა რამდენჯერმე ამა თუ იმ კანდიდატურის საკითხთან დაკავშირებით ხელმოწერაზე უარი თქვა.

"პრეზიდენტს ამ მოდელის პირობებში არ ეთქმის სიტყვა იმასთან დაკავშირებით, ვინ იქნება უკეთესი, რომელ ქვეყანაში თავის გამოცდილებიდან უნარ-ჩვევებიდან გამომდინარე. ამის საპირისპიროდ, ჩვენ რამდენჯერმე გვქონდა საქართველოს მთავრობას შემთხვევა, როდესაც საქართველოს პრეზიდენტმა ამა თუ იმ კონკრეტული კანდიდატურის საკითხთან დაკავშირებით უარი განაცხადა ხელმოწერაზე.

[...] ვინაიდან საქართველოს პრეზიდენტი მაინც იყენებს იმ უფლებას, რომელიც მას არ აქვს კონსტიტუციით მინიჭებული, საქართველოს მთავრობამ სწორედ გუშინ მივიღეთ გადაწყვეტილება, რომ მივმართოთ საკონსტიტუციო სასამართლოს, რომელმაც უნდა განმარტოს და თქვას, საქართველოს მთავრობა კითხულობს სწორად კონსტიტუციურ ნორმას, თუ საქართველოს პრეზიდენტი", — აცხადებს წულუკიანი.

მთავრობამ პრეზიდენტ სალომე ზურაბიშვილსა და მთავრობას შორის უფლებამოსილების გამიჯვნის საკითხზე საკონსტიტუციო სასამართლოს მიმართა.

როგორც მთავრობის ადმინისტრაციის უფროსი, რევაზ ჯაველიძე აცხადებს, პრეზიდენტის მიერ ელჩების დანიშვნასა და გათავისუფლების თაობაზე წარდგინებების უარყოფა არ წარმოაგდენს მის კონსტიტუციურ უფლებამოსილებას. შესაბამისად, მისი თქმით, მთავრობა ითხოვს განმარტებას ინტიტუციებს შორის უფლებამოსილების გამიჯვნის თაობაზე.