ქართული ოცნების დეპუტატი, არჩილ თალაკვაძე ამბობს, რომ ლევან და დავით ბერძენიშვილები ნაციონალური მოძრაობის "მეორე სიხშირე" არიან. თალაკვაძე ფიქრობს, რომ ისინი ამბობენ იმას, რასაც "ენმ ვერ ამბობს".

"ბერძენიშვილები ნაციონალური მოძრაობის მეორე სიხშირე არიან და რომ გადართავენ ნაციონალური მოძრაობის ლიდერები და მაქედან ექსპერიმენტებს ატარებენ საქართველოს ისტორიაზე, საქართველოს ეკლესიაზე, ეროვნულ ღირებულებებზე და ყველა იმ ფასეულობებზე, რამაც ეს ქვეყანა დღემდე მოიყვანა, ეგ საზოგადოებამ კარგად იცის. ეს არის იგივე ნაციონალური მოძრაობის მეორე სიხშირე, მეორე არხი. რასაც ვერ ამბობს ნაციონალური მოძრაობა, ამბობენ ძმები ბერძენიშვილები", — თქვა მან პარლამენტში.

მას შემდეგ, რაც რესპუბლიკური პარტიის ერთ-ერთმა ლიდერმა, ხათუნა სამნიძემ ქართული ოცნების თავმჯდომარის, ირაკლი კობახიძის გამოსვლა ძალადობის წახალისებად შეაფასა, თალაკვაძემ სამნიძეს მიმართა და ის ძალადობის წახალისებაში თავად დაადანაშაულა.

"ხათუნა სამნიძეს მინდა ვუთხრა, ძალადობის წახალისებაში ჩვენ რომ გვადანაშაულებს, სინამდვილეში, ჩვენ ვგმობთ ძალადობას და ვრეაგირებთ ძალადობაზე. აქაც პოლიციამ დროულად იმოქმედა და დაიცვა ეს ადამიანები ძალადობისგან. ძალადობა და ძალადობის წახალისება სინამდვილეში არის ის, რასაც თქვენ აკეთებდით და თქვენ აკეთებთ, როდესაც მთავარ მოძალადეს აცხადებთ თავისუფალი მედიის მენეჯერად. როდესაც ადამიანის უფლებების უფლებების უმძიმეს დარღვევებში ბრალდებული ადამიანი გმირად გამოგყავთ საქართველოს საზოგადოების და ევროპის წინაშე", — ამბობს თალაკვაძე პარლამენტში.

დღეს, 7 ივნისს, ირაკლი კობახიძემ სამნიძესა და დავით ბერძენიშვილზე თავდასხმიდან მეორე დღეს პარლამენტის ტრიბუნიდან ლევან ბერძენიშვილს "უსამშობლო" და უღმერთო" კაცი უწოდა. მისი აზრით, ძმებ ბერძენიშვილებს აქვთ "ზიზღი ქართველი ხალხისა და ქვეყნის მიმართ". ასევე, თქვა ისიც, რომ თითქოს "ეროვნულ იდენტობაზე შეტევა" ხორციელდება.

გუშინ, 6 ივნისს რესპუბლიკური პარტიის ლიდერებს დავით ბერძენიშვილსა და ხათუნა სამნიძეს თავს დაესხნენ. როგორც ბერძენიშვილმა ჟურნალისტებს უთხრა, ერთ-ერთმა თავდამსხმელმა თქვა — "შენ და შენი ძმა, ჩვენს წმინდას როგორ აგინებთ".

ამავე თემაზე: