რესპუბლიკური პარტიის ლიდერის, ხათუნა სამნიძის განცხადებით, ქართული ოცნების თავმჯდომარე, ირაკლი კობახიძე თავისი განცხადებებით მოძალადეებს ახალისებს. მისი თქმით, კობახიძემ ქვეყნისთვის მნიშვნელოვან საკითხებზე უნდა ისაუბროს, თუმცა ამას არ აკეთებს და ძალადობას ახალისებს. ამის შესახებ სამნიძემ პლენარულ სხდომაზე ისაუბრა.

"გვესმის კობახიძისგან წახალისება ძალადობის, რომელსაც აქვს ადგილი ქვეყანაში და ამ წახალისებასთან ერთად მოწოდება, რომ მომავალშიც ყველა მოძალადე ვინც არ ეთანხმება, რომელიმე პოლიტიკოსს, პოლიტიკურ შეხედულებას, მზად იყოს, რომ მათი თავდასხმა არ იქნება არც დასჯილი, პირიქით. თურმე ახლა მმართველი პარტიის თავმჯდომარემ უნდა ისაუბროს ეროვნულ იდენტობაზე და სინამდვილეში მეფის კრიტიკა და ერეკლე მეორის კრიტიკა კი არ არის მისთვის პრობლემა, ქართული ოცნების მეფე მთავარი პატრონი, ამ ქვეყნის არაფორმალური მმართველი რომ გააკრიტიკა ლევან ბერძენიშვილმა, ეს არის პრობლემა", — თქვა მან.

დეპუტატი საუბრობს, რომ საქართველოს იდენტობას სწორედ ირაკლი კობახიძე ებრძვის, რადგანაც არ საუბრობს რეალურ პრობლემებზე და ცდილობს, საზოგადოება ერთმანეთს დააპირისპიროს. მისი განცხადებით, ქართულ ოცნებაში მთავარი დნმ არის ძალადობა.

"გუშინ პირველად მითხრა ჩემმა შვილმა, გარეთ საღამოს მარტო ნუ გახვალო. აი, ამ სიტყვების გამო მარტო, არ გაპატიებთ არც ერთ შემთხვევაში, არც ერთხელ, როდესაც მოძალადეებს მოუწოდებთ და წაახალისებთ ძალადობას. არავის არ შეგვეშინდება მარტო სიარული ამ ქვეყანაში. ამას მემუქრებოდნენ გუშინ სწორედ ისინი ვინც თქვენ წაახალისეთ, რომ ვერ გაივლით ამ ქვეყანაში და ამ ქალაქში მარტოო. ასეთ მოძალადეებს ახალისებდა თავის გამოსვლაში ირაკლი კობახიძე. ფრთხილად ბატონო ირაკლი, ასეთი მეთოდებით იბრძოდნენ ყველა ხელისუფლების დროს", — ამბობს სამნიძე.

მისი თქმით, ქვეყანაში, როდესაც ასეთი დიდი პოლარიზებაა, არ შეიძლება მოწოდებები, რომ თავს დაესხან განსხვავებული აზრის მქონე ადამიანებს.

გუშინ, 6 ივნისს რესპუბლიკური პარტიის ლიდერებს დავით ბერძენიშვილსა და ხათუნა სამნიძეს თავს დაესხნენ. როგორც ბერძენიშვილმა ჟურნალისტებს უთხრა, ერთ-ერთმა თავდამსხმელმა თქვა — "შენ და შენი ძმა, ჩვენს წმინდას როგორ აგინებთ".

თავდასხმიდან მეორე დღეს ქართული ოცნების თავმჯდომარემ, ირაკლი კობახიძემ პარლამენტში პლენარულ სხდომაზე თქვა, თითქოს ხორციელდება "შეტევა ეროვნულ იდენტობაზე". მისი აზრით, ძმებ ბერძენიშვილებს აქვთ "ზიზღი ქართველი ხალხისა და ქვეყნის მიმართ".

ამავე თემაზე:

• არ ვიცი, ვინ დაესხა თავს ბერძენიშვილს და სამნიძეს, მაგრამ მათ ჰქვიათ კოლექტიური ირაკლი კობახიძეები — სამადაშვილი