ცნობილი პოპვარსკვლავები ჩივიან, რომ თავიანთი ლეიბლები ტიკტოკების გადაღებას აიძულებენ.

ცოტა ხნის წინ ამერიკელმა მომღერალმა Halsey-მ ტიკტოკზე გამოაქვეყნა ვიდეო, სადაც ამბობდა, რომ სიმღერის გამოშვებამდე თავისი ხმის ჩამწერი სტუდია აიძულებდა, ვიდეოგაზიარების პოპულარულ პლატფორმაზე "ყალბად" გამოჩენილიყო.

"დავიღალე", — დაწერა მუსიკოსმა ვიდეოს აღწერაში.

პოპვარსკვლავის ვიდეომ ინტერნეტსივრცეში არაერთგვაროვანი გამოხმაურება გამოიწვია. მით უმეტეს, ბევრმა შენიშნა, რომ ვარსკვლავები, რომლებიც წინათ აპლიკაციას თავს არიდებდნენ — მაგალითად, ედ შირანი და FKA Twigs — ტიკტოკზე გამოჩნდნენ.

ინტერნეტმომხმარებლების ერთი ნაწილი ამტკიცებს, რომ ტიკტოკზე ვიდეოს გამოქვეყნება და ჩივილი, რომ ამის გაკეთებას ლეიბლი გაიძულებს, პლატფორმაზე ერთგვარ ტრენდადაც იქცა.

მიზეზის შესაძლო სხვადასხვაობის მიუხედავად, Halsey-ის ვიდეო, სადაც იგი ამბობს, რომ არ უნდა, ვირუსული ვიდეოების გადაღება უწევდეს, მართლაც ვირუსული გახდა. მომღერლის მტკიცება, რომ ეს "მთლიანად მარკეტინგია" სიმართლესთან ახლოსაა, რადგან ტიკტოკის ერთ-ერთი ძირითადი ნაწილი მუსიკაა, ლეიბლებსა და ხმის ჩამწერ სტუდიებს კი კარგად მოეხსენებათ, რომ პლატფორმას მილიარდი მომხმარებელი ჰყავს — შესაბამისად, თავიანთი შექმნილი პროდუქტის რეკლამირება მათ მილიარდიანი აუდიტორიისთვის შეუძლიათ.

ბერკლის კოლეჯის პროფესორი ჯორჯ ჰოუარდი ამბობს, რომ ბოლოდროინდელი ტენდენცია მას იმ დროს ახსენებს, როცა მომღერლებს დიდად არ ეპრიანებოდათ MTV-ისთვის ვიდეოკლიპების გადაღება.

ჰოუარდის თქმით, მუსიკოსებმა დამოუკიდებლად უნდა გადაწყვიტონ, სურთ თუ არა ვირუსული ტიკტოკ ვიდეოების შექმნა. თუმცა, ამასთან, ლეიბლს სიმღერის გამოშვებამდე შეიძლება მისი წინასწარი რეკლამირება დასჭირდეს, რადგან ორივე მხარის მიერ ხელმოწერილი კონტრაქტით გათვალისწინებული მისი ვალდებულება სწორედ ესაა. ბერკლის პროფესორი ასევე აღნიშნავს, რომ მომღერლებს ახალი მუსიკის გამოშვება არ შეუძლიათ მხოლოდ მაშინ, როცა ეს მოესურვებათ, რადგან ლეიბლის რესურსს იყენებენ.

"ეს თითიდან გამოწოვილი კამათის საგანია", — ამატებს ჰოუარდი, — "თუკი გსურთ, რომ მუსიკოსებსა და ლეიბლებს შორის უთანასწორობაზე ვისაუბროთ, დისკუსია დღეებსაც გასტანს, მაგრამ მისი ნაწილი ეს საკითხი ვერ იქნება".

რამდენიმე ინდიბენდის სოციალური მედიის მენეჯერის, ნელ კოქრეინის თქმით, ვირტუალური სივრცე ხელოვანებისთვის წინათაც დიდ შესაძლებლობას წარმოადგენდა, თუმცა, ბევრს, მხოლოდ "მუსიკის შექმნა და კონცერტებზე გამოსვლა" სურდა. ამის მიუხედავად, ზოგიერთმა, მაგალითად, ტეილორ სვიფტმა, თავისი კოლეგების დამოკიდებულებები შეცვალა.

"სოციალურ მედიაში ყოველთვის ნამდვილი უნდა იყო", — დასძენს კოქრეინი, — "არასდროს მსურდა, ყალბი გამოვჩენილიყავი. ხალხს სიყალბის ცნობა კილომეტრიდანაც შეუძლია".

ტიკტოკის აუდიტორია კი სიყალბეს ნამდვილად არ სწყალობს — ბევრ მომღერალს ანგარიშის გაუქმებაც მოუხდა, როცა მომხმარებლებმა "არაგულწრფელობაში" დასდეს ბრალი.

მომღერლებს, რომლებიც "გულწრფელობას" ამჯობინებენ, შეიძლება არც დასჭირდეთ სოციალური მედიის მენეჯერის დახმარება, თუმცა, ამ შემთხვევაში უწევთ, დამოუკიდებლად გადაიღონ და დაამონტაჟონ ვიდეო, რომელიც ვირუსულ ტიკტოკად უნდა იქცეს — რაც დამატებითი სამუშაოა.

და მიუხედავად იმისა, რომ ზოგიერთ მომღერალს სოციალური ქსელები დიდად არ მოსდის თვალში, აშკარაა, რამხელა გავლენა აქვთ ვირტუალურ სივრცეებს — განსაკუთრებით კი ტიკტოკს, მუსიკალურ ინდუსტრიაზე. ბოლო წლების განმავლობაში ბევრი სიმღერა ჩარტების ჰიტად სწორედ ტიკტოკის დამსახურებით იქცა.