ქართული ოცნების თავმჯდომარის, ირაკლი კობახიძის განცხადებით, მოსამართლე ლაშა ჩხიკვაძეზე აშშ-ის საელჩოს დუმილი მათ პოზიციაზე თანხმობის ნიშანია. მისი თქმით, ამით დადასტურდა, რომ "ბრალდებები", რასაც ოპოზიცია საელჩოს უყენებდა, იყო "ცარიელი სპეკულაცია და სრული დემაგოგია.

"ჩვენ ვთხოვეთ, როგორც მოგეხსენებათ, ამერიკის საელჩოს, რომ გაევრცელებინათ ამის საპირისპირო ინფორმაცია, რასაც ოპოზიცია ავრცელებდა და ჩვენ ისიც გვესმის, რომ ამ განცხადების გაკეთება საელჩოს გაუჭირდება, იმიტომ, რომ უხერხულია იმაზე საუბარი, რომ დისკრიმინაციას არ ვაკეთებ, ხომ. ბუნებრივია, უხერხულობას შეიცავს ასეთი განცხადება. ჩვენ გვესმის, აბსოლუტურად, ამერიკის საელჩოში.

დადასტურდა, პრაქტიკულად, უკვე, რომ ის ბრალდებები, რასაც უყენებდა ამერიკის საელჩოს ოპოზიცია, იყო ცარიელი სპეკულაცია და სრული დემაგოგია. ეს არის ის შემთხვევა, როდესაც დუმილი არის ჩვენს პოზიციაზე თანხმობის ნიშანი. საუბარი იმაზე, რომ დისკრიმინაცია არ ჩამიდენია, რა თქმა უნდა, უხერხულობას შეიცავს. არც ველოდით, რომ აშშ-ის საელჩო ასეთ განცხადებას გააკეთებდა, რომ არ ჩავდივარ დანაშაულს, არ ჩავდივარ დისკრიმინაციას", — თქვა მან.

მისი თქმით, შესაბამისად, ძალაში დარჩა, რომ ოპოზიცია აშშ-ის საელჩოს დისკრიმინაციასა და დანაშაულის ჩადენას "აბრალებდა", ხოლო საბოლოო ჯამში, გაირკვა, რომ ეს ყველაფერი იყო "სიცრუე და ცარიელი პროპაგანდა".

16 მაისს ლაშა ჩხიკვაძემ ნიკა გვარამიას 3 წლითა და 6 თვით პატიმრობა მიუსაჯა და დაუყოვნებლივ დაკავების ბრძანება გასცა. 20 მაისს რამდენიმე მედიამ წყაროებზე დაყრდნობით გაავრცელა ინფორმაცია, რომ ჩხიკვაძე საელჩომ ამოაგდო პროგრამიდან, რომლის ფარგლებშიც კვალიფიკაციის ასამაღლებლად აშშ-ში მიდიოდა.

20 მაისს ლაშა ჩხიკვაძემ არ უპასუხა კითხვას, მოხსნეს თუ არა აშშ-ის საელჩოს პროგრამიდან. როგორც მან On.ge-ის განუცხადა, ამ თემაზე კომენტარს არ აკეთებდა.