დღეს ჩრდილოეთ კორეამ ამერიკის შეერთებული შტატებისა და სამხრეთ კორეის სადაზვერვო ორგანიზაციები მათი ლიდერის, კიმ ჩენ ინის, მკვლელობის წარუმატებელ მცდელობაში დაადანაშაულა. ინფორმაციას AP ავრცელებს.

ჩრდილოეთ კორეის უსაფრთხოების დაცვის მინისტრმა ადგილობრივი მედიის საშუალებით განაცხადა, რომ ისინი გაანადგურებენ CIA-სა და სამხრეთ კორეის სადაზვერვო უწყების "ტერორისტებს", რომლებმაც მიზანში მისი ქვეყნის ლიდერი ამოიღეს.

ჩრდილოეთ კორეა ამერიკის წინააღმდეგ ბრალდებებით ხშირად გამოდის, თუმცა, დღეს გაჟღერებული ბრალდების დეტალები შინაარსობრივად უჩვეულო იყო.

მინისტრის განცხადებით, 2014 წლის ივნისში სადაზვერვო სამსახურებმა "იდეოლოგიურად მოისყიდეს" რუსეთში მომუშავე ჩრდილოეთ კორეის მოქალაქე, რათა სამშობლოში დაბრუნების შემდეგ კიმ ჩენ ინი მოეკლა.

ჩრდილოეთ კორეის ოფიციალურმა პირმა დასძინა, რომ აღნიშნულ პირს სამხრეთ კორეის აგენტებმა ფული და სატელიტური საკომუნიკაციო მოწყობილობები გადასცეს, რათა კიმ ჩენ ინი საჯაროდ გამოსვლის დროს ბიოქიმიური იარაღით მოეკლა. მისი თქმით, ეს იარაღი შხამიან ნივთიერებას გამოყოფს.

მინისტრის განცხადებით, სამხრეთ კორეის სადაზვერვო სააგენტომ, ხანგრძლივი მოლაპარაკებებისა და ფულის გადახდის შემდეგ, ჩრდილოეთ კორეას განუცხადა, რომ აღნიშნული ნივთიერება ამერიკისგან მიიღო.

სამხრეთ კორეას და ამერიკას აღნიშნულზე კომენტარი ჯერ არ გაუკეთებია.