დროას ლიდერი ელენე ხოშტარია ქართული ოცნების თავმჯდომარის, ირაკლი კობახიძის მოწოდების პასუხად აცხადებს, რომ ოპოზიცია იმაზე მეტს ვერ გააფუჭებს, რასაც კობახიძე აფუჭებს ევროპარლამენტარების ლანძღვით.

"რა უნდა გააფუჭოს ოპოზიციამ იმაზე მეტი, ვიდრე ირაკლი კობახიძის ანა ფოტიგაზე, ვიოლა ფონ კრამონზე, ანუ ევროპარლამენტარებზე, იმ ინსტიტუტის წარმომადგენლებზე, რომლებმაც გადაწყვეტილება უნდა მიიღოს, ლანძღვაა? ამაზე მეტი რა უნდა გააფუჭოს ოპოზიციამ, როდესაც კითხვარში წერია, ჟურნალისტებს ხომ არ იჭერთო და შენ იჭერ.

რა უნდა გააფუჭოს იმაზე მეტი, როცა გეუბნებიან, რომ ძალადობა ცუდია და შენ ალტ-ინფოს ხელს უწყობ. რა უნდა გააფუჭო იმაზე მეტი, როდესაც კითხვარში წერია, რომ სასამართლო დამოუკიდებელი რომ არ არის, რა ვქნათო და შენ აგრძელებ ამ სასამართლოთი მანიპულირებას. ამის პასუხი მათ მიიღეს ამერიკისგან, როდესაც კონკრეტული მოსამართლე ვერსად ვერ წავიდა ამ განაჩენის შემდეგ", — ამბობს ის TV პირველის ეთერში.

მისი თქმით, საქმის კეთების ბერკეტები ხელისუფლების ხელშია, ისინი კი ამ საქმეს აფუჭებენ და ოპოზიცია მკაფიოდ ამბობს, რომ ქართველი ხალხი იმსახურებს ევროკავშირის კანდიდატობის სტატუსს.

დღეს ირაკლი კობახიძემ ოპოზიციას, მათ "ლობისტებს" და დასავლელ პარტნიორებს მოუწოდა, საჯაროდ ჩამოთვალონ რა უნდა ექნა და არ გააკეთა ხელისუფლებამ უკრაინის მხარდასაჭერად. მისი თქმით, საჯაროდ დასმულ კითხვებს "ოცნება" საჯაროდ გასცემს პასუხს.