"რუსი ოლიგარქები მოიკითხეთ თქვენს ტელევიზიებში ეს შემიძლია გითხრათ", — ასე უპასუხა ქართული ოცნების თავმჯდომარემ, ირაკლი კობახიძემ კითხვას, არის თუ არა ბიძინა ივანიშვილი რუსი ოლიგარქი.

"სირცხვილია ახლა, ამას რომ ამბობთ, მე მგონი, თქვენც არ გჯერათ. თქვენ მუშაობთ სააკაშვილის და კეზერაშვილის ტელევიზიებში. სააკაშვილის და კეზერაშვილის ტელევიზიებში მომუშავე ადამიანები ასეთ განცხადებებს რომ აკეთებენ, ეს არის, მინიმუმ სირცხვილი. ჯერ გათავისუფლდით სააკაშვილისგან და კეზერაშვილისგან და მერე გააკეთეთ მსგავსი განცხადებები", — თქვა მან ბრიფინგზე.

ამ კითხვამდე კობახიძე უკრაინელ მაღაჩინოსნებზე, მათ შორის პოდოლიაკსა და გონჩარენკოზე, საუბრობდა და თქვა, რომ ისინი რუსეთთან დაახლოებული პირები იყვნენ. როგორც პარტიის თავმჯდომარე ამბობს, ზოგიერთი უკრაინელი პოლიტიკოსი "40 წლის ასაკში გახდა პატრიოტი".