პრემიერმინისტრი ირაკლი ღარიბაშვილი აცხადებს, რომ საქართველოს შესახებ ბრიუსელის კვლევითი ორგანიზაციის, CEPS-ის კრიტიკულ სტატიის თანაავტორი ელენე ხოშტარიაა. ღარიბაშვილი ამბობს, რომ საერთოდ არ აინტერესებს "ვინ რა დაჯღაპნა".

"რომლის თანახელმომწერი თუ თანაავტორი არის ელენე ხოშტარია? ასეა, მე ასე გავიგე. საერთოდ არ მაინტერესებს ვინ რა დაწერა, ვინ რა დაჯღაპნა. ეს არის მორიგი დადასტურება ინფორმაციისა, რაც მე გითხარით, რომ ჩადიან მავნებლურად ეს ანტისახელმწიფოებრივი მტრული ძალები და ეხვეწებიან ევროპელ ლიდერებს, რომ რამენაირად ის პროგრესი, რომელსაც ჩვენ მივაღწიეთ, არ იყოს ასახული", – თქვა მან.

CEPS-მა გუშინ გამოაქვეყნა კრიტიკული სტატია საქართველოს შესახებ, სადაც წერდა, რომ ევროკავშირში გაწევრიანების განაცხადი მთავრობის მხრიდან სიმბოლურია და სინამდვილეში მათ პროცესის წარუმატებლობის დაჩქარება სურთ. ორგანიზაცია წერდა, რომ უკვე გამოაქვეყნეს მსგავსი სტატიები უკრაინასა და მოლდოვაზე და ევროკავშირმა უნდა მისცეს კანდიდატის სტატუსი ორივე ქვეყნას.

CEPS-ის თქმით, იმისთვის, რომ ევროკავშირმა საქართველოს წევრის სტატუსი მისცეს, საჭიროა ახალი პოლიტიკური გარემო, რომლის მთავარი მახასიათებელიცაა დემოკრატიული კულტურა და დემოკრატიული სასამართლო სისტემა. მათი თქმით, ამ ეტაპზე საქართველოს ევროკავშირში გაწევრიანების პროცესის დაწყება ნაჩქარევია.

ორგანიზაცია წერს, რომ მთავარი არხის დირექტორის, ნიკა გვარამიას დაკავება დამაზიანებელია ისეთ დროს, როცა ქვეყანამ ევროკავშირის წევრობისთვის სასამართლოს მაღალი ევროპული სტანდარტი უნდა აჩვენოს. CEPS-ის თქმით, საქართველოს ხელისუფლებისთვის დამახასიათებელია, ჩაერიოს მაღალი ინსტანციის სასამართლოს იმ გადაწყვეტილებებში, რომლებიც პოლიტიკოსებსა და მედიის წამყვან ფიგურებს ეხებათ.