საგარეო საქმეთა და უსაფრთხოების პოლიტიკის საკითხებში ევროკავშირის უმაღლესმა წარმომადგენელმა, ჯოზეფ ბორელმა საქართველოს გაეროში რუსეთუს წინააღდეგ კენჭისყრაში მონაწილეობისთვის მადლობა გადაუხადა და სთხოვა, დააწესოს სანქციები, რათა მათ ეფექტურობას საფრთხე არ შეექმნას.

"ვაფასებთ გაეროში კენჭისყრის დროს მხარდაჭერას. გვესმის, რამდენად რთულია თქვენთვის რუსეთის საწინააღმდეგოდ მოქმედება, მაგრამ, ასევე, უნდა გთხოვოთ სანქციების აღსრულება, რათა საფრთხე არ შეექმნას მათ ეფექტურობას", — თქვა მან.

ბორელმა ისაუბრა ევროკავშირის წევრობის კანდიდატის კითხვარზეც და განაცხადა, რომ ასეთ დროს მნიშვნელოვანია საკვანძო რეფორმების დაჩქარება, განსაკუთრებით მართლმსაჯულების მიმართულებით.

"ეს არის შესაძლებლობების ფანჯარა და ის მოითხოვს ტემპის გაზრდას, რომ თავიდან იქნას აცილებული ნებისმიერი ტიპის პოლარიზაცია, გაგრძელდეს რეფორმები, განსაკუთრებით მართლმსაჯულების მიმართულებით, რადგან ეს არის საკვანძო საკითხები. ევროკავშირი არის პოლიტიკური სისტემა, რომელსაც საფუძვლად კანონის უზენაესობა, სრულად ანგარიშვალდებული, დამოუკიდებელი მართლმსაჯულება უდევს და ნებისმიერი კანდიდატისგან ამას ვითხოვთ", — ამბობს ის.

6 მაისს საქართველომ კითხვარის მეორე ნაწილის შევსება დაასრულა. საქართველოს ევროკავშირის წევრობის კითხვარი 11 აპრილს გადასცეს. ქვეყანამ ევროკავშირის წევრობის კანდიდატის სტატუსის მიღებაზე განაცხადს ხელი 3 მარტს მოაწერა.