როგორც იცით, სულ ცოტა ხსნის წინ ისთ ფოინთმა თავისი მომხმარებლისთვის უპრეცედენტოდ საოცარი გათამაშება მოაწყო. ბევრ სუპერ პრიზთან ერთად, მთავარი პრიზი, ერთ ღამით უფასო შოპინგი გათამაშდა. მთავარ გამარჯვებულს საშუალება ეძლეოდა, ისთ ფოინთში განთავსებულ ყველა მაღაზიაში მთელი ღამის განმავლობაში შესულიყო და უფასოდ ეშოფინგა.

გამარჯვებული 23 აპრილს, Facebook Live-ის დროს გამოვლინდა.

იღბლიანი მომხმარებელი დიმიტრი მაკეევი გახდა, რომელმაც აქციის მიმდინარეობისას ისთ ფოინთში მდებარე ელიტ ელექტრონიკსში ტელეფონი შეიძინა და გათამაშების 28 ბილეთი ჰქონდა.

როგორც დიმიტრი ამბობს, რომ თავის მეგობრებთან ერთად ნათლულის დაბადების დღეს აღნიშნავდა და სწორედ მაგ დროს აცნობეს, რომ გათამაშების გამარჯვებული გახდა.

"თავიდან მეგონა ჩემი მეგობარი მეხუმრებოდა, მაგრამ მერე გათამაშების ვიდეო ვნახე და ძალიან გამიხარდა", ამბობს ის.

ადგილზე მისულ დიმიტრის ისთ ფოინთის მერი თეონა ჩიხლაძე შეეგება და სიმბოლური გასაღები ჩააბარა. შემდეგ კი, ის ისთ ფოინთის ტერიტორიაზე მთელი ღამით დატოვეს და ყველა მაღაზიის კარი გაუხსნეს.

დიმიტრიმ არც აცია, არც აცხელა და ყველა მაღაზიას სათითაოდ ჩამოუარა:

დიმიტრი პირველ მაღაზიაში, რომელიც Massimo Dutti აღმოჩნდა, მორცხვად და ფრთხილად შევიდა, მაგრამ 645 ლარის პროდუქციით ხელდამშვენებულს სითამამე შეემატა და შემდეგ მაღაზიებს უკვე სწრაფად და თავდაჯერებულად მიადგა.

მაღაზიიდან მაღაზიაში გადასვლისას მას ცხენოსნები, ბაიკერები, ბალერინებისა და დრამერების გუნდი ამხნევებდნენ.

ტანსაცმელი, ფეხსაცმელები, პარფიუმერია, აქსესუარები - დიმიტრიმ ჯამში 9475 ლარის პროდუქცია გამოიტანა.

თქვენ შეიძლება თქვათ, რომ დიმიტრის ადგილზე უფრო მეტს წამოიღებდით, შეიძლება ჩანთები მხრებამდე აგეცვათ, კისერზე ჩამოგეკიდებინათ, ერთი ორი პატარა პარკი კბილებითაც დაგეჭირათ, მაგრამ ასე თავდაჯერებულიც ნუ იქნებით. გახსოვდეთ, რომ ეკრანზე ყველაფერი ბევრად ადვილი ჩანს და თანაც შეიძლება დროც არ გყოფნოდათ, ტანსაცმელს და ფეხსაცმელს არჩევა და მოზომვა ხო უნდა? აქსესუარებიც უნდა შეამოწმო - რომელი მოგიხდება, იქ კიდე პარფიუმერი გოგო ძალიან ბევრს მოგიყვებათ, რომელი კრემი ჯობია თქვენი კანისთვის და ა.შ.

"ბოლოს რამდენიმე მაღაზია გამოვტოვე კიდეც, ვეღარ ვძრავდი და ვეღარ მიმქონდა და ორგანიზატორებს ვუთხარი, რომ შოფინგის დასრულება მინდოდა", ამბობს დიმიტრი.

მისი თქმით, მაღაზიებიდან წამოღებული ნივთების ნახევარი საჩუქრებად დაარიგა.

"ორი დღით ადრე მე და ჩემი მეგობრები მივედით და წინასწარ ავარჩიეთ რაღაცები", გაგვიმხილა მან თავისი სტრატეგია.

მოკლედ, დიმიტრი აშკარად იმსახურებს შექებას, როგორც დაგეგმვის, ასევე განხორციელების ფაზაში. ჩვენ კი, მივულოცოთ მას და მის მეგობრებს ეს წარმატებული შოფინგი.