"ენმ-ს პერიოდში ამ სიმძიმის დანაშაულისთვის შეიძლება, ციმბირი უკან მოეტოვებინათ", — ამბობს ქართული ოცნების დეპუტატი, მიხეილ სარჯველაძე მთავარი არიხის გენერალური დირექტორის, ნიკა გვარამიას დაკავებასთან დაკავშირებით.

"არხებზე რომლებზეც თქვენ საუბრობთ, იმათ სათავეში უდგათ ან რაღაცნაირად დაკავშირებულები არიან ადამიანებთან, რომლებიც არიან ნაციონალური მოძრაობის ხელისუფლებასთან. რომლის პერიოდშიც სხვათაშორის ამ სიმძიმის დანაშაულლისთვის შეიძლება, რა ვიცი, გაციმბირება, ციმბირი უკან მოეტოვებინათ", — ამბობს ის ჟურნალისტებთან.

მან ისაუბრა, რომ წინა ხელისუფლლება ხშირად ჩადიოდა დანაშაულს და აღნიშნა — "არ მგონია, რომ ამ შემთხვევაში ეს მოწმენდილ ცაზე მეხს წარმოადგენდეს".

დღეს, 16 მაისს სასამართლომ მთავარი არხის დამფუძნებელი, ნიკა გვარამია დამნაშავედ ცნო და მას 3 წლითა და 6 თვით პატიმრობა მიუსაჯა. სასჯელის მოხდის ვადა 16 მაისიდან დაიწყო და მოსამართლემ გვარამიას დარბაზშივე დაკავების ბრძანება გასცა.

ნიკა გვარამიას წინააღმდეგ გამოძიება პროკურატურამ 2019 წლის 20 ივლისს დაიწყო. საქმე ეხება ბრალდებას ტელეკომპანია რუსთავი 2-ის კანონიერი ინტერესის საწინააღმდეგოდ უფლებამოსილების ბოროტად გამოყენების შესახებ. კერძოდ, ტელეკომპანიის ყოფილ დირექტორს, ნიკა გვარამიას წინასწარი შეთანხმებით ჯგუფის მიერ სამსახურებრივი მდგომარეობის გამოყენებით, დიდი ოდენობით ქონების გაფლანგვის, კომერციული მოსყიდვის, ყალბი ოფიციალური დოკუმენტის დამზადება-გამოყენებას ედავებოდნენ.

განაჩენის გამოცხადების შემდეგ, სასამართლო დარბაზიდან გვარამიამ დაპოსტა და მოუწოდა ხალხს დარჩნენ მთავარ არხზე და ერთად მოიპოვონ თავისუფლება. არხის ჟურნალისტებმა კი განაცხადეს, რომ ბრძოლა გრძელდება, უფრო მეტად, ვიდრე აქამდე.

საერთაშორისო გამჭვირვალობა საქართველომ აღნიშნა, რომ გვარამიას დასჯით სასამართლომ პოლიტიკური დაკვეთა შეასრულა. GDI-ის ხელმძღვანელმა, ედუარდ მარიკაშვილმა კი თქვა, რომ ეს კიდევ ერთი მაგალითია იმისა, რომ ავტორიტარიზმში ვცხოვრობთ. გიორგი მშვენიერაძის განცხადებით, ამ ქვეყანაში ყველაფერი დანაშაულია, ბიძინა თუ მტრად გთვლის და ყველაფერი კანონიერია, ბიძინას ლაქია თუ ხარ.

ამავე თემაზე: