უკრაინის პრეზიდენტმა, ვოლოდიმირ ზელენსკიმ განაცხადა, რომ რუსეთის ომი უკრაინის წინააღმდეგ დასრულდება მაშინ, როდესაც უკრაინა დაიბრუნებს ყველაფერს რაც მას ეკუთვნის. ამის შესახებ მან საფრანგეთის წამყვანი უნივერსიტეტების სტუდენტებთან ონლაინ შეხვედრის დროს ისაუბრა.

"ომი უკრაინელი ხალხისთვის დასრულდება მხოლოდ მაშინ, როცა ჩვენ დავიბრუნებთ იმას, რაც ჩვენია. გულწრფელად ვამბობ: ძალიან ბევრი არ გვჭირდება, ჩვენ გვინდა, რომ ჩვენს სახელმწიფოს, ჩვენს მიწას მშვიდობა დავუბრუნოთ. რუსეთმა სათითაოდ წაგვართვა, დაიპყრო ყველა ჩვენი უფლება — უფლება ჩვენს მიწაზე, არჩევანის უფლება, ბოლოს მივედით სიცოცხლის უფლებაზე", — ამბობს ის.

ზელენსკიმ ფრანგ ახალგაზრდებს აუხსნა, რომ უკრაინა ახლა იბრძვის სიცოცხლის უფლებისთვის, კარგავს საუკეთესო უკრაინელების სიცოცხლეს. მან განმარტა, რომ მოლაპარაკებები შეიძლება წარიმართოს მხოლოდ იმ თვალსაზრისით, რომ რუსეთი გაიაზრებს თავისი გადაწყვეტილებების მცდარობას და კატასტროფულ ხასიათს და მზად იქნება დაისაჯოს უკრაინაში ჩადენილი დანაშაულებისთვის.