ამბერ ჰერდს განქორწინებიდან მიღებული მილიონები უფლებათადამცველი ორგანიზაციისთვის უნდა შეეწირა, მაგრამ ასე არ მოიქცა

2016 წელს ამბერ ჰერდმა განქორწინების შედეგად 7 მილიონი დოლარი მიიღო და განაცხადა, რომ თანხის ნახევარს ადამიანის უფლებათადამცველ ორგანიზაცია ACLU-ს გადაურიცხავდა. თუმცა როგორც ორგანიზაციის ოფიციალური წარმომადგენელი აცხადებს, მათ ამ თანხის ძალიან მცირე ნაწილი მიიღეს.

ACLU-ს წარმომადგენლის თქმით, როგორც წესი, ორგანიზაციას ფული ერთბაშად არ ერიცხება და მათ ამბერ ჰერდს გადახდის გრაფიკიც შესთავაზეს, თუმცა მსახიობმა ამაზეც უარი განაცხადა. "ჩვენ ამბერ ჰერდს 2019 წელს დავუკავშირდით და თანხის დარჩენილი ნაწილის ჩარიცხვა ვთხოვეთ, თუმცა პასუხად ის მივიღეთ, რომ ფინანსური სირთულეები ჰქონდა", — ამბობს ACLU-ს წარმომადგენელი.

ამბერ ჰერდმა ორგანიზაციას $350,000 ჩაურიცხა, თუმცა მისი დაპირების მიხედვით, განქორწინებიდან მიღებული თანხის ერთი ნახევარი ACLU-თვის, ხოლო მეორე ნახევარი ლოს-ანჯელესის ბავშვთა საავადმყოფოსთვის უნდა შეეწირა.

უნდა აღინიშნოს, რომ ჯონი დეპმა ACLU-ს ამბერ ჰერდის სახელით $100,000 გადაუხადა და გარდა ამისა, ამბერ ჰერდის სახელით ორგანიზაციაში კიდევ $500,000 და $350,000 ჩარიცხეს, რაც დაპირებული თანხიდან მხოლოდ 1,3 მილიონია. ორგანიზაციის თქმით, $500,000 ამბერ ჰერდის ყოფილმა შეყვარებულმა, ილონ მასკმა ჩარიცხა, თუმცა ამას "გადამწყვეტი მნიშვნელობა" არ აქვს.

ACLU-ს წარმომადგენელმა ისიც აღნიშნა, რომ ორგანიზაციის იურისტები ამბერ ჰერდს 2018 წლის სტატიის დაწერაში დაეხმარნენ, რომელიც ოჯახურ ძალადობას ეხებოდა და Washington Post-ში გამოქვეყნდა. შეგახსენებთ, რომ ჯონი დეპისა და ამბერ ჰერდის სასამართლო პროცესი ჯერ კიდევ გრძელდება, ჯონი დეპმა კი ACLU-ს ამ სტატიის გამო უჩივლა, იმის მიუხედავად, რომ სტატიაში მისი სახელი არსად არის ნახსენები. ACLU-ს წარმომადგენელმა ამაზე პასუხად განაცხადა, რომ მართალია, ამბერ ჰერდი თავის პირად გამოცდილებაზე საუბრობს, თუმცა სტატია ჰერდისა და ჯონი დეპის ურთიერთობას პირდაპირ არ ეხება.