ვირჯინიის შტატში გრძელდება ბოლო დროის ერთ-ერთი ყველაზე გახმაურებული სასამართლო პროცესი — მსახიობი ჯონი დეპი თავის ყოფილ ცოლს, ამბერ ჰერდს 2018 წელს გამოქვეყნებული ოპ-ედის გამო, სადაც ჰერდი ოჯახში ძალადობის გამოცდილებაზე წერს, ცილისწამებისთვის უჩივის.

სასამართლოზე ჩვენება მისცა ოჯახური ურთიერთობის საკითხების კონსულტანტმა, რომელთანაც თავიანთი ქორწინების პრობლემებზე ჯონი დეპი და ამბერ ჰერდი ერთად ყოფნის დროს საუბრობდნენ.

პროფესიით კლინიკურმა ფსიქოლოგმა, ლორელ ანდერსონამ განაცხადა, რომ წყვილის თანაცხოვრების პერიოდში "ორმხრივ ძალადობას" ჰქონდა ადგილი.

თერაპევტის თქმით, ბავშვობაში ორივე ფიზიკური ძალადობის მსხვერპლი იყო. ჯონი დეპი ათწლეულების განმავლობაში საკუთარ თავზე კონტროლს ინარჩუნებდა, მაგრამ ამბერ ჰერდი ის ფაქტორი აღმოჩნდა, რამაც მას "ძველი ტრავმა გაუღვიძა".

როცა მას ჰკითხეს, ძალადობდა თუ არა დეპი ჰერდზე, ასე უპასუხა:

"ის თავშეკავებული იყო ალბათ 20 ან 30 წლის განმავლობაში. ორივე [ბავშვობაში] ოჯახში ძალადობის მსხვერპლია, მაგრამ ჩემი აზრით, დეპი ათწლეულების განმავლობაში საკუთარ ქმედებებს აკონტროლებდა. შემდეგ კი ჰერდთან ყოფნის დროს მან ეს კონტროლი დაკარგა და როგორც მე აღვიქვი, ერთმანეთზე ორმხრივად ძალადობდნენ".

ოჯახური ურთიერთობის საკითხების კონსულტანტის თქმით, ამბერ ჰერდმა არაერთხელ წამოიწყო ჩხუბი იმისთვის, რომ "[დეპი] მასთან დარჩენილიყო, რადგან მიტოვება მისთვის ყველაზე საშინელი კოშმარი იყო".

"თუ [დეპი] დააპირებდა, რომ ჩხუბის გასანეიტრალებლად იქაურობას გასცლოდა, ის [ჰერდი] უფრო მეტად ესხმოდა თავს, რადგან ერჩივნა, ეჩხუბათ, ვიდრე მიეტოვებინა", — დასძინა თერაპევტმა.

2015 წლის დეკემბერში ჰერდმა ანდერსონს დაურეკა და უთხრა, რომ სახეზე დალურჯებები ჰქონდა. ფსიქოლოგმა დაადასტურა ეს შემთხვევა და აღნიშნა, რომ ჰერდის სახე თავის დროზე ფოტოებითაც ნახა და ფიზიკურადაც და მას მართლა აღენიშნებოდა დალურჯებები.

ამ შემთხვევის შემდეგ სესიაზე დეპმა განაცხადა, რომ "ამბერმა ის მიიღო, რაც დაიმსახურა". ანდერსონის თქმით, ეს ისე გაიგო, რომ ჰერდი "მასსავით [დეპივით] ძლიერ ეჩხუბებოდა და ჯონი უფრო მეტად ცდილობდა სიტუაციის განეიტრალებას, ვიდრე ის [ამბერი]".

ამბერ ჰერდი სასამართლო პროცესზე 14 აპრილს.

ფოტო: Shawn Thew / POOL/AFP

ჯონი დეპი სასამართლო პროცესზე 14 აპრილს.

ფოტო: Shawn Thew / POOL/AFP

ჯონი დეპი ყოფილ ცოლს 2018 წელს ჟურნალ Washington Post-ში გამოქვეყნებული ტექსტის გამო უჩივის, რომელშიც ამბერი ოჯახურ ძალადობასა და მასთან გამკლავების გზებზე წერს. სტატიაში ჯონი ნახსენები არაა, თუმცა იქამდე, 2016 წელს, მათი დაშორების შემდეგ ჰერდიმ ყოფილი ქმარი ღიად დაადანაშაულა ძალადობაში, რასაც დეპი უარყოფს.

აღსანიშნავია, რომ 2018 წელს დეპმა ბრიტანულ ტაბლოიდს, The Sun-საც უჩივლა, როცა ამ უკანასკნელმა მსახიობს "ცოლზე მოძალადე" უწოდა. მან ეს სასამართლო დავა წააგო, გასაჩივრების შემდეგ კი სააპელაციო ინსტანციამ გადაწყვეტილება ძალაში დატოვა. სხვათა შორის, წაგებული სასამართლო დავის შემდეგ Warner Bros.-მა დეპს როლის დატოვება მოსთხოვა. მსახიობმა შარშან აღნიშნა, რომ "ჰოლივუდი ბოიკოტს უცხადებს", ხოლო "ბოიკოტის გამოცხადების კულტურის პირობებში არავის აქვს თავი ქუდში".

ასევე იხილეთ: