ყოფილი ცოლის, ამბერ ჰერდის, წინააღმდეგ ჯონი დეპის მიერ სასამართლოში 2019 წელს შეტანილი სარჩელის განხილვა სულ მალე დაიწყება: სასამართლო პროცესი ამ წლის 11 აპრილს გაიმართება და მასზე ამბერ ჰერდი მოწმეებად მოიწვევს ცნობილ ბიზნესმენ ილონ მასკსა და მსახიობ ჯეიმს ფრანკოს.

ჯონი დეპი ყოფილ მეუღლეს 2018 წელს ჟურნალ Washington Post-ში გამოქვეყნებული ტექსტის გამო უჩივის, რომელშიც ამბერი ოჯახურ ძალადობასა და მასთან გამკლავების გზებზე წერს. სტატიაში ჯონი ნახსენები არაა, თუმცა იქამდე, 2016 წელს, მათი დაშორების შემდეგ ჰერდიმ ყოფილი ქმარი ღიად დაადანაშაულა ძალადობაში, რასაც დეპი უარყოფს.

იმის გამო, რომ ბრიტანელი ტაბლოიდი The Sun ჯონი დეპს "მოძალადე ქმარს" უწოდებდა, მან "ცილისწამებისთვის" სარჩელი ამ ტაბლოიდის წინააღმდეგაც შეიტანა, თუმცა 2020 წელს დავა წააგო: ლონდონის სასამართლოს დადგენილებით, დეპი ცოლზე ნამდვილად ძალადობდა, ამიტომ მის შესახებ ტაბლოიდის მიერ გამოყენებული შეფასება "ცოლის მცემელი" სულაც არ იყო ცილისწამება.

ამჯერად განაჩენს ვირჯინიის შტატის სასამართლო გამოიტანს.

ამბერმა მოითხოვა, რომ ვირჯინიის შტატის სასამართლოში ჯონის მიერ შეტანილი სარჩელი სასამართლოს არ განეხილა, რადგან დიდ ბრიტანეთში მიღებული გადაწყვეტილება არსებითად გავლენას უნდა ახდენდეს ზოგად სამართალწარმოებაზე. ამ ყველაფრის არგუმენტად ისიც გამოდგება, რომ ორივე სარჩელი ემყარება მოძალადის ბრალდებებს. ყველაფრის მიუხედავად, ვირჯინიის მოსამართლემ აგვისტოში დეპის სარჩელი დააკმაყოფილა და ამბერის მოთხოვნა დავის შეჩერების შესახებ უარყო.

როგორც ამერიკული მედია იუწყება, სასამართლო პროცესზე ამბერის მოწმეები მისი მეგობარი ჯეიმს ფრანკო, მსახიობი ელენ ბარკინი და ტესლას დამფუძნებელი ილონ მასკი იქნებიან. WandaVision-ის მსახიობი პოლ ბეტანი კი დეპის მოწმე იქნება.

ჰერდმა ადრე პროცესზე ჯეიმს ფრანკო უკვე ახსენა, რომელსაც საიდუმლოდ გაუმხილა, რომ ჯონთან ჩხუბის შედეგად სხეულზე სისხლჩაქცევები ჰქონდა. დეპი ამტკიცებს, რომ ჰერდს რომანი ჰქონდა ილონ მასკთან, როცა მათი ქორწინებიდან (2015) "ერთი თვეც კი არ იყო გასული".

ჯონი და ამბერი ერთმანეთს 2011 წელს ფილმის The Rum Diary გადაღებაზე შეხვდნენ და 2016 წლის მაისში დაშორდნენ, როცა ჰერდმა შემაკავებელი ორდერის გამოწერა მოითხოვა და მაშინ ჯერ კიდევ მისი ქმარი, ჯონი დეპი, ძალადობაში დაადანაშაულა. დეპმა უარყო ყველა ბრალდება და ყოფილი წყვილი ერთმანეთს სასამართლო პროცესების გარეშე 2016 წლის აგვისტოში დაშორდა. ემბრემა თქვა, რომ ქორწინებიდან მიღებული 7 მილიონი დოლარი ქველმოქმედებას შესწირა.

როგორც ცნობილია, მომავალ სასამართლოზე პირად შეტყობინებებსაც განიხილავენ — მიმოწერებს ჰერდსა და ჯონს შორის და ასევე მათ კოლეგებთან პირად საუბრებს. ამ ყველაფერში მონაწილეობას ჰარი პოტერის წიგნების სერიის ავტორი, ჯოან როულინგიც მიიღებს. ცნობილია, რომ ის საჯაროდ იცავდა დეპს, თუმცა მისი შემოქმედების მიხედვით გადაღებული ფილმების სერიაში ჯადოსნური ცხოველები ჯონი დეპმა როლი მაინც დაკარგა და ის მადს მიკელსენმა ჩაანაცვლა.

გასულ წელს ჯონმა ერთ-ერთ ბრიტანულ გამოცემასთან აღნიშნა, რომ ჰოლივუდმა მას ბოიკოტი გამოუცხადა, თუმცა იმედოვნებს, რომ მალე ყველაფერს "ნათელი მოეფინება".

დეპმა თავდაპირველად სარჩელი ცილისწამების ფაქტზე 2019 წელს შეიტანა, მისმა ადვოკატებმა კი სარჩელში აღნიშნეს: "ბატონ ჯონს არასდროს მიუყენებია ზიანი ქალბატონი ამბერისთვის. 2016 წელს მის წინააღმდეგ გამოთქმული ბრალდებები იყო მცდარი. ეს ყველაფერი იყო დახვეწილი თაღლითობის ნაწილი, რომელიც სპეციალურად შემუშავდა ქალბატონი ჰერდისტვის საჯარო ყურადღების მისაქცევად და მისი კარიერის განვითარებისთვის".

სარჩელის საპასუხოდ ჰერდის წარმომადგენელმა განაცხადა: "ეს უაზრო ქმედება არის ჯონი დეპის განმეორებითი და ბოლო მცდელობა, გააჩუმოს ყოფილი ცოლი. სინამდვილეში მას ვერ გააჩუმებენ. ბატონი ჯონის ქმედებები ადასტურებს, რომ მას ეს არ შეუძლია. ჩვენ გავიმარჯვებთ და დავამარცხებთ მას ამ ბრძოლაში, დავასრულებთ დეპისა და მისი იურიდიული გუნდის მიერ ჩემი კლიენტის უსაფუძვლო შევიწროებას."