შინაგან საქმეთა სამინისტროს განცხადებით, დააკავეს 1992 წელს დაბადებული კაცი, რომელმაც მძინარე მშობლები მოკლა, შემდეგ კი სახლს ცეცხლი წაუკიდა.

უწყების ცნობით, 27 აპრილს ისანი-სამგორის სამმართველოში შეტყობინება შევიდა, რომ ერთ-ერთ ბინაში ხანძარი იყო, მისულებს კი კარები შიგნიდან ურდულით დახვდათ დაკეტილი. ბინაში შეღწევის შემდეგ კი ორი ადამიანის ცხედარი იპოვეს.

"ბინაში შეღწევის და ხანძრის ლიკვიდაციის შემდეგ, ნანახი იქნა 1964 წელს დაბადებული ზ.ბ-ის და მისი მეუღლის -—1967 წელს დაბადებული ლ.თ-ის დამწვარი ცხედრები, რომლებსაც თავის არეში ცეცხლნასროლი ჭრილობები აღენიშნებოდათ. გამოძიებით დადგინდა, რომ ბრალდებულმა საცხოვრებელ ბინაში მძინარე მშობლებს, ზ.ბ-ს და ლ.თ-ს ცეცხლსასროლი იარაღიდან გასროლით თავის არეში დაზიანებები მიაყენა, რის შედეგადაც ორივე მათგანი ადგილზე გარდაიცვალა", — ნათქვამია განცხადებაში.

უწყების თქმითვე, ბრალდებულმა დანაშაულის დაფარვის მიზნით ყაჩაღობის ინსცენირება მოახდინა — კარადებიდან ტანსაცმელი და სხვა ნივთები გადმოყარა, მშობლების თანხა და სამკაულები იპოვა, ბინაში ხანძარი გააჩინა და ადგილიდან მიიმალა. შსს-მ ნივთმტკიცებად ბინიდან წაღებული ნივთები ამოიღო.

შსს-ის ცნობით, ოჯახის ორი ან მეტი წევრის მიმართ დამამძიმებელ გარემოებაში ჩადენილ განზრახ მკვლელობის ფაქტზე გამოძიება სისხლის სამართლის კოდექსის 11 პრიმა 109-ე მუხლის მე-2 ნაწილის ვ ქვეპუნქტით და 109-ე მუხლის მე-3 ნაწილის ა ქვეპუნქტით მიმდინარეობს. მათივე თქმით, დანაშაული 16-დან 20 წლამდე ან უვადო თავისუფლების აღკვეთას ითვალისწინებს.