დროისა და მიზეზ-შედეგობრიობის თანამედროვე გაგება ალბერტ აინშტაინის ფარდობითობის ზოგად თეორიას ეფუძნება, რომელიც დრო-სივრცის ურთიერთმიმართებას ხსნის. მისი სისწორე მეცნიერებმა ექსპერიმენტულად უკვე დაამტკიცეს და დროში მოგზაურობის ახსნაც სცადეს, თუმცა ის, რაც მათემატიკურად სწორია, ფიზიკურ რეალობასთან შესაბამისობაში ყოველთვის ვერ მოვა.

ამ საკითხის განხილვისას რამდენიმე პრობლემას ვაწყდებით. პირველი მათგანი პრაქტიკულია და ეგზოტიკურ მატერიას ეხება, რომელიც უარყოფითი ენერგიის მქონე მატერიაა და დროში მოგზაურობისთვის აუცილებელია. თუმცა, ჩვენ გარშემო მსგავს რამეს ასე მარტივად ვერ ვიპოვით და შექმნაც გაგვიჭირდება, ყოველ შემთხვევაში, საკმარისი რაოდენობით. არაა გამორიცხული, რომ ამაში დღესდღეობით არსებული ტექნოლოგიების შეზღუდული შესაძლებლობები ან კვანტურ მექანიკაში გაურკვევლობა გვიშლიდეს ხელს.

ასევე, იხილეთ: შესაძლოა, დრო საერთოდ არ არსებობდეს — რას ცვლის ეს

მეორე პრობლემა ნაკლებად პრაქტიკული, მაგრამ ბევრად მნიშვნელოვანია — დროში მოგზაურობა ლოგიკას ეწინააღმდეგება, რაც პარადოქსების სახით ვლინდება. ერთ-ერთი მაგალითია თანმიმდევრულობის დარღვევა, როცა კონკრეტული მოვლენა წარსულის ცვლილებას იწვევს, თუმცა თავად ეს ცვლილება პირველად მოვლენას გამორიცხავს.

უფრო გასაგები რომ იყოს, წარმოიდგინეთ, თითქოს დროის მანქანით 5 წუთის წინანდელ წარსულში გადახვედით და დროის მანქანა გაანადგურეთ. გამოდის, რომ 5 წუთის შემდეგ მას ვეღარ გამოიყენებთ, წარსულში ვერ დაბრუნდებით და ვერც გაანადგურებთ. სხვა სიტყვებით რომ ვთქვათ, დროის მანქანა მხოლოდ მაშინ განადგურდება, თუ არ განადგურდება, რაც პარადოქსულია.

ასევე, იხილეთ: ჩვენს სამყაროს შესაძლოა, ორეული ჰყავდეს, რომელშიც დრო პირუკუ გადის

მეცნიერთა აზრით, ეს მოცემულობა მაშინ გაუქმდება და ლოგიკური წინააღმდეგობაც მოიხსნება, თუ პარალელური დროების/ისტორიების არსებობას დავუშვებთ. ეს იმას ნიშნავს, რომ წარსულში მოგზაურობისას დროის სულ სხვა მიმდინარეობაში გადავინაცვლებთ, რომელიც ორიგინალურ დროსთან დაკავშირებული არ იქნება, ანუ იქ დროის მანქანის განადგურებით არაფერი შეიცვლება.

კვანტური მექანიკის მიხედვით, დროის ასეთი "დაყოფა" შეუძლებელი სულაც არაა. ამჟამად ზემოხსენებული ჰიპოთეზის ავტორები მუშაობენ თეორიაზე, რომელიც ფარდობითობის ზოგად თეორიასთან სრულ შესაბამისობაში მოვა.