ლელომ საკანონმდებლო ინიციატივა წარადგინა, რომლის მიხედვითაც, საქართველოში რუსეთის ომი სიმბოლოები, V-ისა და Z-ის გამოყენება უნდა აიკრაძლოს. პარტიის წევრის, სალომე სამადაშვილის თქმით, ქვეყანაში მათი გამოყენება დასჯადი უნდა გახდეს.

პარტიაში აღნიშნავენ, რომ უკრაინაში შეჭრის შემდეგ რუსეთი პროპაგანდისტულ გზავნილებსა და სიმბოლოებს საკუთარი აგრესიისა და პუტინის რაშიზმის გასამართლებლად იყენებს. ლელოში დასძენენ, რომ ეს საქართველოს წინააღმდეგ მიმართული ქმედებაცაა.

"მიგვაჩნია, რომ საქართველოს შესაბამის საკანონმდებლო ბაზაში უნდა შევიდეს ცვლილება, რომელიც დასჯადს გახდის ჩვენს ქვეყანაში რუსეთის აგრესიული პოლიტიკის სიმბოლოებად ქცეული შესაბამისად, სიმბოლოების გამოყენების აკრძალვას.

ასეთი სიმბოლოები, რომელიც ჩვენი შეხედულებით უნდა აიკრძალოს, ეს არის ე.წ წმინდა გიორგის ლენტი, მოგეხსენებათ, იცით ყველამ, გინახავთ. სამწუხაროდ, ხშირად ვხედავთ საჯარო სივრცეში ჩვენს ქვეყანაშიც, ასევე, უკრაინის წინააღმდეგ მიმდინარე ომის პირობებში. რუსეთის აგრესიის სიმბოლოდ ქცეული ლათინური ასოების V-ის და Z-ის გამოყენება, ასევე, ჩვენი აზრით, უნდა გახდეს დასჯადი ჩვენს ქვეყანაში", — განაცხადა სამადაშვილმა.

უკრაინაში შეჭრის შემდეგ რუსეთი ომის სიმბოლოდ ქცეულ Z-ს პროპაგანდისთვის აქტიურად იყენებს. სამხედრო ექსპერტებისა და ანალიტიკოსების თქმით, პირველად Z რუსულ ტანკებზე უკრაინის საზღვართან, 19 თებერვალს დააფიქსირეს. მაშინ დასავლელ ექსპერტებს წარმოდგენა არ ჰქონდათ, რისი აღმნიშვნელი შეიძლება ყოფილიყო ეს სიმბოლო.

რუსეთის თავდაცვის სამინისტრო ამბობს, რომ Z ნიშნავს Za pobedu (გამარჯვებისთვის), V კი — "სიმართლის ძალას".