"გენერლებმა გაიღვიძეს ნაბახუსევზე, მიხვდნენ, რომ მათი არმია მძ*ნერია", — Tinkoff ბანკის დამფუძნებელი, ოლეგ ტინკოვი, რომელსაც ევროკავშირისა და აშშ-ს სანქციები შეეხო, უკრაინაში ვლადიმერ პუტინის ომის წინააღმდეგ კიდევ ერთხელ გამოდის. CNN-ის ცნობით, ის ასევე მოხვდა 24 მარტს ბრიტანეთის მიერ რუსი ოლიგარქებისთვის დაწესებულ სანქციებში.

"იღუპება უდანაშაულო ხალხი და ჯარისკაცები. გენერლებმა გაიღვიძეს ნაბახუსევზე, მიხვდნენ, რომ მათი არმია მძ*ნერია და როგორ იქნება არმია კარგი, როცა ქვეყანაში ყველაფერი მძ*ნერია, ჩაძირულია ნეპოტიზმში და წოდების დიდებებში. კრემლის ჩინოვნიკები შოკში არიან, რომ არა მხოლოდ ისინი, არამედ მათი შვილებიც ვერ წავლენ ხმელთაშუა ზღვაზე დასასვენებლად.

ბიზნესმენები ცდილობენ გადაარჩინონ დარჩენილი ქონება, რა თქმა უნდა, არიან დებილები, რომლებიც Z-ს ხატავენ, მაგრამ დებილი ყველა ქვეყანაში 10%-ია, რუსების 90% ამ ომის წინააღმდეგია. ძვირფასო "კოლექტიური დასავლეთო", გთხოვთ, მიეცით პუტინს მკაფიო გასასვლელი, რომ გადაარჩინოს საკუთარი სახე და შეწყვიტოს ეს ხოცვა-ჟლეტა. იყავით უფრო რაციონალურები და ჰუმანური", — წერს ის.

რუს ოლიგარქებს ომის წინააღმდეგ აქამდეც გაუკეთებიათ განცხადებები. მას შემდეგ, რაც სანქცირებულთა სიებში მოხვდნენ, ოლეგ ტინკოვმა, ოლეგ დერიპასკამ და მიხაილ ფრიდმენმა განაცხადეს, რომ ომს მხარს არ უჭერენ.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში