NASA-ს Artemis მისია, რომელსაც, სავარაუდოდ, რამდენიმე თვეში გაუშვებენ, ადამიანების მთვარეზე დაბრუნების საქმეში მნიშვნელოვან წვლილს შეიტანს. მართალია, Artemis 1 მისია ეკიპირებული არ იქნება და მთვარეზე ჯერ ფიზიკურად ვერავინ დაადგამს ფეხს, თუმცა შეგვეძლება, დედამიწის ბუნებრივ თანამგზავრზე საკუთარი სახელები მაინც გავგზავნოთ.

აღსანიშნავია, რომ Artemis 1-ის ფარგლებში მთვარეს 6 დღის განმავლობაში შემოუვლიან გარს, თავად მისია კი დაახლოებით 25 დღეს გასტანს. როგორც უკვე ვახსენეთ, იგი ეკიპირებული არ იქნება, თუმცა SLS-ისა (NASA-ს ახალი რაკეტა, რომელიც კოსმოსის შესწავლას ისახავს მიზნად) და Orion-ის მოდულისთვის, რომელშიც მომავალში ასტრონავტებს დააბინავებენ, უდიდესი ტესტირების როლს შეასრულებს.

ამ ბმულზე შეგიძლიათ, სამგზავრო ბარათის მისაღებად საკუთარი მონაცემები შეიყვანოთ, თქვენი სახელი კი ფლეშ-მეხსიერების მოწყობილობაში შეინახება. შემდეგ მას Orion-ის შიგნით მოათავსებენ — თქვენ თუ არა, კოსმოსში თქვენი მონაცემები მაინც წავა.

ფოტო: NASA

საგულისხმოა, რომ, თუ მთვარეზე გამგზავრება თავადაც გსურთ, პირველი რამდენიმე გაშვებისას ეკიპაჟი უკვე შერჩეულია. Artemis 2, მთვარის ახალი პროგრამის პირველი ეკიპირებული მისია, სავარაუდოდ, 2024 წელს შესრულდება.

ამჟამად Artemis 1-ის რაკეტას გამშვებზე ტესტავენ, სანამ საბოლოოდ გაგზავნიან კოსმოსში. მსგავსი მისიები საბოლოოდ Artemis 3-მდე მიგვიყვანს, რომელიც მთვარეზე ადამიანებს დასვამს. საგულისხმოა, რომ ეს უკანასკნელი 2025 წლამდე არ იგეგმება.

თუ სტატიაში განხილული თემა და ზოგადად: მეცნიერებისა და ტექნოლოგიების სფერო შენთვის საინტერესოა, შემოგვიერთდი ჯგუფში – შემდეგი ჯგუფი.