სამოქალაქო საზოგადოებრივი ორგანიზაციები ევროკავშირის კითხვარისა და პასუხების გასაჯაროვებას ითხოვენ. არასამთავრობო სექტორის განცხადებით, ევროკავშირში გაწევრიანების პროცესი უნდა იყოს გამჭვირვალე და ინკლუზიური, ასევე, მნიშვნელოვანია მასში სამოქალაქო საზოგადოების ჩართულობის უზრუნველყოფა.

"ჩვენ, ხელმომწერ ორგანიზაციებს მიგვაჩნია, რომ ევროკავშირში გაწევრიანების პროცესი უნდა იყოს ღია, გამჭვირვალე და ინკლუზიური. მნიშვნელოვანია, მასში სამოქალაქო საზოგადოების ჩართულობის უზრუნველყოფა. ხაზს ვუსვამთ, რომ სამოქალაქო საზოგადოებას გააჩნია ღირებული გამოცდილება, მსგავსი კითხვარის გამოყენებით საქართველოში მართლმსაჯულების, კორუფციის წინააღმდეგ ბრძოლისა და ადამიანის უფლებების სფეროში (ევროკავშირში გაწევრიანების მოლაპარაკებების 23-ეთავი) არსებული მდგომარეობის შეფასებას უკავშირდება.

აღნიშნულის გათვალისწინებით, მოგმართავთ თხოვნით, მოხდეს საქართველოსთვის გადაცემული კითხვარის და პასუხების გასაჯაროება, რაც ყველა დაინტერესებულ აქტორს პროცესში ჩართვისა და ევროინტეგრაციის გზაზე საკუთარი წვლილის შეტანის შესაძლებლობას მისცემს", — ამბობენ ორგანიზაციები.

განცხადებას ხელს აწერენ შემდეგი ორგანიზაციები:

  • ღია საზოგადოების ფონდი;
  • პარტნიორობა ადამიანის უფლებებისთვის;
  • დემოკრატიის ინდექსი საქართველო;
  • სამართლისა და პოლიტიკის კვლევის ინსტიტუტი;
  • საქართველოს ჟურნალისტური ეთიკის ქარტია;
  • საქართველოს ახალგაზრდა იურისტთა ასოციაცია;
  • უფლებები საქართველო;
  • სოციალური სამართლიანობის ცენტრი;
  • ღია სივრცე კავკასია;
  • სოციალურ მეცნიერებათა ცენტრი;
  • ტოლერანტობის და მრავალფეროვნების ინსტიტუტი;
  • კავშირი საფარი;
  • ციხის საერთაშორისო რეფორმა;
  • სამართლიანი არჩევნებისა და დემოკრატიის საერთაშორისო საზოგადოება;
  • პრევენცია პროგრესისთვის;
  • ინფორმაციის თავისუფლების განვითარების ინსტიტუტი;
  • საერთაშორისო გამჭვირვალობა საქართველო.