CBS-ის ჟურნალისტმა უკრაინის პრეზიდენტ ვოლოდიმირ ზელენსკის ჰკითხა, რატომ არის ხისტი საერთაშორისო ორგანიზაციებთან ლაპარაკისას. მან პრეზიდენტს NATO-სა და გაეროში გამოსვლები გაახსენა. ზელენსკიმ ჟურნალისტს უპასუხა, რომ დიპლომატიას შედეგი არ აქვს, ბიუროკრატიულია და ამიტომ, ასეთი საუბარი გამართლებულია. მანვე აღნიშნა, რომ ბევრმა ქვეყანამ შეიცვალა აზრი უკრაინის შესახებ, მაგრამ ამისთვის უკრაინამ მაღალი ფასი გადაიხადა.

"როცა მუშაობ დიპლომატიით, შედეგი არ არის. ეს ყველაფერი ძალიან ბიუროკრატიულია. ამიტომ, ჩემი ასეთი საუბარი მათთან აბსოლუტურად გამართლებულია. მეტი სიცოცხლე არ მაქვს გასაცემი. მეტი ემოცია აღარ მაქვს. მე აღარ მაინტერესებს მათი დიპლომატია, რომელიც ჩემი ქვეყნის განადგურებას იწვევს. ბევრმა ქვეყანამ შეიცვალა აზრი უკრაინისა და ჩვენი ხალხის შესახებ, მაგრამ ვფიქრობ, ჩვენ ძალიან მაღალი ფასი გადავიხადეთ ამისთვის", — თქვა მან.

ზელენსკის გამოსვლები საერთაშორისო ორგანიზაციებსა და სხვადასხვა ქვეყნის პარლამენტებში კრიტიკულობით გამოირჩეოდა. ის პირდაპირ მოუწოდებს ყველას უკრაინის დახმარებისა და ქმედითი ნაბიჯების გადადგმისკენ.