Russia For Sale — ასე ჰქვია კრეატიული სააგენტო ლივინგსტონის ახალ პროექტს, რომელიც რუსეთის მიწებს NFT-ის სახით ყიდის. ვებგვერდი, სახელად russiaforsale.org საშუალებას გაძლევთ, რუსეთის სასურველი მიწა "შეიძინოთ" — გადახდილი თანხით კი უკრაინას დაეხმაროთ.

"პუტინის რეჟიმის ჯოჯოხეთური აგრესიის პასუხად გადავწყვიტეთ, რომ დროა, რუსეთი ნაწილებად დაიშალოს და გაიყიდოს, ხოლო ფული სასარგებლო მიზნებს მოხმარდეს უკრაინაში", — ვკითხულობთ ლივინგსტონის ფეისბუქგვერდზე.

ვებგვერდზე 2 500-მდე მიწა იყიდება თავისი ნამდვილი სახელით, მიწის ფართობითა და გერბით. მიწები ფართობის მიხედვით რამდენიმე კატეგორიად იყოფა და მათი ფასიც ფართობის ზრდასთან ერთად იზრდება — მცირე ზომის მიწები იაფი ღირს, მნიშვნელოვანი ქალაქები — ძვირი. სასურველი ტერიტორიის შეძენა ნებისმიერ მსურველს კრიპტოვალუტის საშუალებით შეუძლია.

შემოსული თანხის 100% უკრაინის ციფრული განვითარების სამინისტროს კრიპტოანგარიშებზე გადაირიცხება. ინიციატივას სამინისტროს წარმომადგენელი ალექს ბორნიაკოვი ტვიტერზე გამოეხმაურა:

"ბრწყინვალე იდეა NFT-ისთვის — რუსეთი იყიდება. ყოველთვის მიყვარდა გონებამახვილი ადამიანები, რომლებსაც სიტყვებსა და იდეებს შორის უჩვეულო კავშირის პოვნა შეუძლიათ. მადლობა".

"მჯერა, რომ მსგავსი პროექტები, ერთი მხრივ, მართლაც ეხმარება ხალხს, ხოლო მეორე მხრივ, გამოდგება შთაგონების წყაროდ, რათა სხვებმაც გამოიგონონ ახალ-ახალი ხერხები, თუ როგორ შეიძლება დავეხმაროთ უკრაინას, ჩვენს მოძმე ერს, ასეთ გასაჭირში", — ამბობს ლივინგსტონის თანადამფუძნებელი და პროექტის შემოქმედებითი ხელმძღვანელი ლევან ლეფსვერიძე.

ლევანის თქმით, რუსეთის მიწების გაყიდვა პროექტის მხოლოდ პირველი ნაწილია. სამომავლოდ იგეგმება რუსეთის შენობების, მათ შორის, კრემლის გაყიდვა. ამის შემდეგ კი ლივინგსტონის გუნდს ლენინის აუქციონზე გატანა და გაყიდვაც სურს.