საქართველოში ამერიკის შეერთებული შტატების საელჩოს განცხადებით, აშშ ოკუპირებულ ცხინვალში მიმდინარე ე.წ საპრეზიდენტო არჩევნებსა და მის შედეგებს არ აღიარებს. განცხადებაში ხაზგასმულია, რომ საქართველოს ტერიტორიული მთლიანობას მტკიცედ უჭერს მხარს.

"ჩვენი პოზიცია აფხაზეთსა და სამხრეთ ოსეთთან დაკავშირებით ცალსახაა: ეს რეგიონები საქართველოს განუყოფელი ნაწილია. ამას ვერ შეცვლის ვერც "არჩევნები" და ვერც აპრიორი უკანონო "რეფერენდუმი", რომელიც სამხრეთ ოსეთს რუსეთის შემადგენლობაში შესვლისკენ მოუწოდებს. შესაბამისად, ჩვენ ხაზს ვუსვამთ ჩვენს მტკიცე მხარდაჭერას საქართველოს სუვერენიტეტისა და ტერიტორიული მთლიანობისადმი მის საერთაშორისოდ აღიარებულ საზღვრებში", — ნათქვამია განცხადებაში.

აშშ რუსეთს მოუწოდებს უკრაინაში ომი და საქართველოს ოკუპაცია შეაჩეროს. მათივე თქმით, რუსეთმა 2008 წლის ცეცხლის შეწყვეტის შეთანხმებით ნაკისრი ვალდებულება უნდა შეასრულოს.

"მათ შორის, რუსეთის ძალების გაყვანა კონფლიქტამდე არსებულ პოზიციებზე, საქართველოს რეგიონების: აფხაზეთისა და სამხრეთ ოსეთის დამოუკიდებლობის აღიარების გაუქმება და ამ რეგიონებში ჰუმანიტარული დახმარების თავისუფლად გადაადგილების უზრუნველყოფა", — ვკითხულობთ განცხადებაში.

ოკუპირებული ცხინვალის რეგიონის ე.წ საპრეზიდენტო არჩევნებში მიმდინარეობს. მონაწილეობას 5 კანდიდატი იღებს.