უკრაინის პრეზიდენტი ვოლოდიმირ ზელენსკი კრამატორსკის რკინიგზის სადგურის დაბომბვას გამოეხმაურა და თქვა, რომ ესაა ბოროტება, რომელსაც საზღვრები არ აქვს. მისივე თქმით, თავდასხმისას დაიღუპა დაახლოებით 30 ადამიანი, 100 კი დაშავდა. პრეზიდენტმა აღნიშნა ისიც, რომ ადგილზე უკვე იმყოფებიან პოლიციელები და მაშველები.

"რუსი მონსტრები თავს არ ანებებენ თავიანთ მეთოდებს. ბრძოლის ველზე წინააღმდეგობის გაწევის ძალა და სიმამაცე არ ყოფნით, ამიტომ ცინიკურად ანადგურებენ მშვიდობიან მოსახლეობას. ეს არის ბოროტება, რომელსაც საზღვრები არ აქვს. და თუ ის არ დაისჯება, არასოდეს გაჩერდება", — ამბობს ის.

ოკუპანტებმა დაბომბეს დონეცკის ოლქში, კრამატორსკის რკინიგზის სადგური, საიდანაც ევაკუაცია მიმდინარეობდა. უკრაინა 24 დონეცკის პოლიციის უფროსზე დაყრდნობით წერს, რომ სადგურს ისკანდერიდან კასეტური ბომბებით გაუხსნეს ცეცხლი, რის შედეგადაც ათეულობით ადამიანი დაიღუპა.