როდესაც ბაზარზე არსებული მდგომარეობა ნაკლებად პროგნოზირებადია, უამრავი შემოთავაზებისა და ფაქტორის ფონზე შეიძლება დაიბნე. სწორედ ამისთვის არსებობენ ბაზრის ანალიტიკოსები, რომ ამ საქმით დაინტერესებულ ადამიანებს სწორი მიმართულებები მისცენ და გადაწყვეტილების მიღებაში დაეხმარონ.

თუ ბაზრის მიმდინარე ტენდენციებს შევხედავთ, ვნახავთ, რომ ბოლო პერიოდში ნავთობის ფასები მზარდია, რაც სხვა ფაქტორებთან ერთად რუსეთის მხრიდან უკრაინაში შეჭრას უკავშირდება. აღსანიშნავია, რომ ნავთობის ფასმა მარტის დასაწყისში 123 დოლარს გადააჭარბა და ბოლო წლების მაქსიმალურ ნიშნულს მიაღწია.

ამასთან, პანდემიურმა კრიზისმა, რომელმაც მიწოდების ჯაჭვისა და ლოგისტიკური პრობლემები გამოიწვია, გადამზიდ კომპანიებზე მოთხოვნა გაზარდა. იმის ფონზე, რომ ეს სექტორი ეკონომიკის თითქმის ყველა სფეროს უკავშირდება და მასზე დამოკიდებულება მაღალია, კომპანიები, რომლებიც აქ საქმიანობენ ანალიტიკოსების მხრიდან ყოველთვის დაკვირვების ქვეშ არიან.

ბაზრის ტენდენციების გათვალისწინებით, ანალიტიკოსები იმ სამ აქციას გამოყოფენ, რომელიც, მათი შეფასებით, ინვესტორების მხრიდან უფრო მეტ ყურადღებას იმსახურებს.

PDC Energy (PDCE)

კომპანია აშშ-შია დაფუძნებული და ნედლი ნავთობისა ბუნებრივის აირის წარმოებით არის დაკავებული. მსოფლიოში შექმნილი მდგომარეობის ფონზე, ნავთობზე ფასების გაზრდამ PDC Energy-ის აქციების ფასების ზრდაც გამოიწვია.

მიმდინარე წლის დასაწყისთან შედარებით, კომპანიის აქციების ღირებულება გაზრდილია 45%-ით, ხოლო გასულ თვესთან შედარებით, ფასიანი ქაღალდების 12,6%-იანი ზრდა ფიქსირდება.

2021 წლის მეოთხე კვარტალში კომპანიის შემოსავლები 207%-ით გაიზარდა და 854,64 მილიონი დოლარი შეადგინა. თუ გასული წლის სრულ მონაცემებს შევხედავთ, ვნახავთ, რომ კომპანიამ 2021 წელს ერთ აქციაზე 7,99 აშშ დოლარის მოგება მიიღო, ხოლო შემოსავლებმა 1,86 მილიარდი დოლარი შეადგინა.

Tourmaline Oil (TRMLF)

Tourmaline Oil კანადის უმსხვილესი ენერგეტიკული კომპანიაა, რომელიც ნავთობისა და ბუნებრივი გაზის წარმოებით არის დაკავებული. როგორც ცნობილია, კანადა მსოფლიო ენერგიის დიდ ნაწილს ფლობს.

არსებული მდგომარეობის გათვალისწინებით, მიმდინარე წლის დასაწყისთან შედარებით კომპანიის აქციების ღირებულება 41,4%-ით გაიზარდა. მიმდინარე წლის წინა თვესთან შედარებით კი ზრდა 10%-ზე მეტია.

გასული წლის მეოთხე კვარტალში Tourmaline Oil-ის შემოსავალმა 1,53 მილიარდ დოლარს გადააჭარბა, რის შედეგადაც ერთ აქციაზე მოგების მოცულობამ 2,96 დოლარი შეადგინა (წლიური ზრდა 30%).

კომპანია საკუთარი აქციონერებისთვის დივიდენდების გადახდასაც განაგრძობს. რამდენიმე ხნის წინ Tourmaline Oil-მა საბაზისო დივიდენდის მოცულობა 0,80 დოლარამდე გაზარდა. როგორც ცნობილია, კომპანია ეგრეთ წოდებულ სპეციალურ დივიდენდს ერთი აქციისთვის 1,25 დოლარის ოდენობით იხდის.

ZIM Integrated Shipping Services Ltd. (ZIM)

ეს კომპანია ისრაელშია დაფუძნებული და მსუბუქი კონტეინერებით ტვირთგადაზიდვით არის დაკავებული. მის სერვისში შედის ტვირთის გადაზიდვა, ციფრული მომსახურება და სხვა.

ZIM-ის აქციების ფასი მიმდინარე წლის დასაწყისთან შედარებით 59%-ით არის გაზრდილი, გასულ თვესთან შედარებით კი ზრდა 4,4%-ია. აღსანიშნავია, რომ კომპანიამ 2021 წელი წარმატებულად დახურა. კერძოდ, მეოთხე კვარტალში შემოსავლები 155%-ით გაიზარდა და 3,47 მილიარდ დოლარს მიაღწია, ხოლო წმინდა შემოსავლების ზრდამ 366%-ით, 1,71 მილიარდი შეადგინა. კომპანიამ დივიდენდების მოცულობაც გაზარდა — ამჟამად ერთ აქციაზე 17 დოლარამდე დივიდენდს იხდიან.

ბოლო მონაცემების მიხედვით, კომპანიის ერთი აქციის ღირებულება 73 დოლარის ფარგლებშია — ბაზრის ექსპერტები ამ მაჩვენებლის ზრდა ელიან.

ვაჭრობა/ინვესტირება დაკავშირებულია მაღალ რისკებთან და იმ შემთხვევაშიც კი, თუ რეკომენდაციების შესაბამისად არის განხორციელებული, შესაძლოა გამოიწვიოს არსებითი დანაკარგები, ისევე, როგორც მოგება. თქვენ დეტალურად უნდა გააანალიზოთ, რამდენად მისაღებია თქვენთვის ვაჭრობა/ინვესტირება თქვენი ფინანსური მდგომარეობის გათვალისწინებით და შეგიძლიათ თუ არა გასწიოთ თანხის დაკარგვის რისკი.

აქციებით ვაჭრობა ახლა უკვე საქართველოს ბანკის მობილბანკით არის შესაძლებელი. ესტუმრე მობილბანკს, რომლის საშუალებითაც ისეთი საერთაშორისო კომპანიების ფასიანი ქაღალდებით ვაჭრობას შეძლებ, როგორებიცაა: Apple, Amazon, Microsoft, Tesla, Google და სხვა. ეს სიახლე საქართველოს ბანკმა მისი ჯგუფის შვილობილი კომპანიის, Galt & Taggart-ისა და საერთაშორისო ფინანსური ტექნოლოგიების პლატფორმა DriveWealth-ის პარტნიორობით დანერგა. თუ გსურს მეტი გაიგო ინვესტიციების შესახებ, ესტუმრე ფეისბუქგვერდს — ინვესტიციები, სადაც გაიგებ მეტს, თუ როგორ ივაჭრო აქციებით.