2022 წლის ოსკარის დაჯილდოების ცერემონიაზე გამარჯვებულების დასახელებასთან ერთად აკადემიის წარმომადგენლებმა და მსახიობებმა უკრაინის მიმართ სოლიდარობაც გამოხატეს. საზოგადოებაში გარკვეული მოლოდინი არსებობდა იმის შესახებ, რომ ოსკარი 2022-ის მაყურებელი ვოლოდიმირ ზელენსკის ვიდეომიმართვას იხილავდა. როგორც ჩანს, აკადემიამ ზელენსკის ვიდეომიმართვის ჩვენების ნაცვლად, უკრაინელი ხალხის მიმართ მხარდაჭერა და სოლიდარობა წუთიერი დუმილით გამოხატა.

ცერემონიაზე რება მაკენტაირის მიერ Somehow You Do-ის შესრულების შემდეგ სცენა გაშავდა და ეკრანზე შემდეგი სიტყვები გამოჩნდა: "გვსურს, რომ წუთიერი დუმილით უკრაინელი ხალხის მიმართ ჩვენი მხარდაჭერა გამოვხატოთ. მიუხედავად იმისა, რომ კონფლიქტისას ჩვენი ჰუმანურობის გამოსახატად ფილმი ერთ-ერთი მნიშვნელოვანი გზაა, რეალობა ის არის, რომ მილიონობით უკრაინელ ოჯახს საკვები, სამედიცინო დახმარება და სუფთა წყალი სჭირდება. ჩვენ, როგორც გლობალური საზოგადოების წევრებს, ერთად მეტის გაკეთება შეგვიძლია. გთხოვთ, როგორც შეგიძლიათ გვერდში დაუდგეთ უკრაინას, #StandWithUkraine".

უკრაინის მიმართ სოლიდარობა მილა კუნისმაც გამოხატა, რომელიც წარმოშობით სწორედ ამ ქვეყნიდანაა. მილა ბავშვი იყო, როცა ოჯახთან ერთად აშშ-ში გადავიდა საცხოვრებლად, ახლა კი უკრაინელი ლტოლვილების მხარდასაჭერად ქმართან ერთად უკვე 20 მილიონი დოლარი შეაგროვა. "ასეთ საშინელ დროს შეუძლებელია, რომ უკრაინელი ხალხის გამძლეობამ არ გაგაოცოს. ისინი ამ წარმოუდგენელ სიბნელეშიც კი ძალას პოულობენ და ბრძოლას აგრძელებენ", — ასე დაახასიათა მილა კუნისმა უკრაინელი ხალხი.

28 მარტს ამერიკის კინოაკადემიამ ოსკარი 2022-ის გამარჯვებულები დაასახელა. ქალის საუკეთესო როლის ნომინაციაში ჯესიკა ჩესტეინმა გაიმარჯვა, ხოლო კაცის საუკეთესო როლის შემსრულებლად უილ სმიტი დაასახელეს. გამარჯვებულების სრული სიის ნახვა ამ ბმულზე შეგიძლიათ.