რუსეთის მიერ უკრაინაში შეჭრის შემდეგ 1 თვე გავიდა, თუმცა უკრაინელი ხალხის გმირობაში ყოველდღიურად უფრო მეტად ვრწმუნდებით. ერთ-ერთი ასეთი უკრაინელი 27 წლის ოლგაა, რომელიც კიევში დაბომბვისას 6 კვირის შვილს გადაეფარა და პატარას სიცოცხლე იხსნა.

ოლგას თქმით, დაბომბვამდე ცოტა ხნით ადრე გაიღვიძა, რათა ბავშვი გამოეკვება. პატარა ვიქტორია საბანში უკვე შეფუთული ჰყავდა, როცა აფეთქებამ ოთახში მინები დაამსხვია. ოლგა ბავშვს მაშინვე ბავშვს გადაეფარა.

ფოტო: Okhmatdyt Children's Hospital

ცოტა ხანში ოლგამ შენიშნა, რომ ვიქტორიას სახე სისხლიანი ჰქონდა და ეგონა, შვილი დაშავდა. ქმარმა, რომელიც აფეთქების ხმამ გააღვიძა, ბავშვი გამოართვა და ქალს უთხრა: "ოლგა, ეს შენი სისხლია და არა — მისი". როგორც აღმოჩნდა, აფეთქების გამო ქალი თავში დაიჭრა და ძლიერი სისხლდენა ჰქონდა.

ოლგა და ბავშვი საავადმყოფოში გადაიყვანეს. ოლგას თავისა და ტანის არეში ბევრი ჭრილობა აქვს, ბავშვს კი, დედის გმირობის წყალობით, მხოლოდ მსუბუქი ჩალურჯებები და ნაკაწრები აღენიშნება. დედა-შვილის ფოტოებმა სოციალური ქსელები დაიპყრო და მთელი მსოფლიო აალაპარაკა.

"ახლა პოზიტიურობის შენარჩუნების გარდა აღარაფერი დაგვრჩენია. უნდა გვჯეროდეს, რომ ეს იყო ყველაზე საშინელი რამ, რაც კი შეიძლებოდა ჩვენს თავს მომხდარიყო", — აცხადებს ოლგას ქმარი.