ევროკავშირის ოფიციალური პირები სანქცირებული რუსი მაგნატების ქონების ომის შემდგომ უკრაინის აღდგენისთვის გამოყენებას განიხილავენ. ინფორმაციას წყაროზე დაყრდნობით Bloomberg ავრცელებს.

გამოცემა წერს, რომ იდეა ადრეულ ეტაპზეა და გადაწყვეტილება მიღებული ჯერ არ არის.

"ამ ეტაპზე აქტივები მხოლოდ გაყინულია", — თქვა ევროკომისიის პრეზიდენტის სპიკერმა, ერიკ მამერმა. მისი თქმით, პრეზიდენტს ამ საკითხის შესწავლასთან დაკავშირებით დავალება არ გაუცია.

როგორც ცნობილია, პუტინის ომს უკრაინაში ცივილიზებული სამყაროს მხრიდან რუსეთის მიმართ უპრეცედენტო სანქციები მოჰყვა. მათ შორის, რუს ოლიგარქებს სანქციები ევროკავშირმაც დაუწესა. ევროპის ქვეყნების სანქციები შეეხო რუსი უმდიდრესი ადამიანების იახტებს, კერძო თვითმფრინავებსა და სხვა სახის ქონებას. მხოლოდ იტალიამ 780 მილიონი ევროს რუსული აქტივები გაყინა.

ხუთშაბათს ევროკავშირმა განაცხადა, რომ ქმნის "გაყინვისა და ჩამორთმევის" სამუშაო ჯგუფს, რათა წევრ ქვეყნებს სანქციების შესრულების საკითხებთან დაკავშირებით ინფორმაცია გაუზიაროს.

Bloomberg წერს, რომ ჯგუფი წევრი ქვეყნების ქმედებებს კოორდინაციას გაუწევს, რათა სანქცირებულ რუს და ბელორუს ოლიგარქებს ჩამოერთვათ ქონება. ამასთან, გამოცემის ცნობით, სადაც კანონმდებლობა მოითხოვს, უნდა მოხდეს მათი კონფისკაცია.

უკრაინა თითქმის ერთი თვეა, რაც რუსეთის თავდასხმებს იგერიებს. პარასკევს ევროპული საბჭოს პრეზიდენტმა, შარლ მიშელმა განაცხადა, რომ უკრაინის სოლიდარობის ფონდის შექმნის შესაძლებლობის შესახებ ვოლოდიმირ ზელენსკის ესაუბრა. ეს მექანიზმი უკრაინას მოკლევადიანი და გრძელვადიანი ეკონომიკური ამოცანების გადაჭრაში უნდა დაეხმაროს. მიშელის თქმით, პარტნიორებს შეეძლებათ, უკრაინის დახმარების საქმეში საერთაშორისო დონორების დახმარებით წვლილი შეიტანონ.