24 თებერვალს რუსეთი უკრაინაში შეიჭრა და ომი დაიწყო, რომელიც დღემდე გრძელდება. ამ დროის განმავლობაში უსაფრთხო თავშესაფრის მოსაძებნად ქვეყანა მილიონობით უკრაინელმა დატოვა. მათ შორის 11 წლის ჰასანიცაა, რომელიც უკრაინიდან სლოვაკეთში სრულიად მარტო ჩავიდა და "ღამის უდიდესი გმირის" წოდებაც დაიმსახურა.

ფოტო: Polícia Slovenskej republiky

სლოვაკეთში ჩასვლისას ჰასანს თან მხოლოდ ზურგჩანთა, პარკი და პასპორტი ჰქონდა, ხელზე კი ტელეფონის ნომერი ეწერა. ჰასანის დედამ წამოსვლა ვერ შეძლო, რადგან ლოგინად ჩავარდნილ ჰასანის ბებიას ოკუპანტებთან მარტო ვერ დატოვებდა. ამის გამო ქალმა გადაწყვიტა, 11 წლის შვილი სლოვაკეთში მარტო გამოეშვა, რათა იქ ჰასანს თავისი და-ძმა ეპოვა და მათთან ერთად უსაფრთხოდ ყოფილიყო.

ფოტო: Polícia Slovenskej republiky

11 წლის ჰასანს დროებით სლოვაკეთში მყოფი მოხალისეები უვლიდნენ, შემდეგ ბავშვის ხელზე დაწერილი ტელეფონის ნომრით მისი ნათესავები იპოვეს და ჰასანი და-ძმასაც შეხვდა. მისი უფროსი დები და ძმა ჰასანზე ყველაზე მეტად ღელავდნენ, რადგან ის დედმამიშვილებს შორის ყველაზე პატარაა. საბედნიეროდ, ცოტა ხნის წინ უკრაინიდან ჰასანის დედა, ბებია და პატარა ცუგაც ჩამოვიდნენ და ახლა მთელი ოჯახი ერთადაა.

ფოტო: Polícia Slovenskej republiky

სლოვაკეთის პოლიციის განცხადებით, ეს პირველი შემთხვევა არაა, როცა ჰასანის ოჯახი ომს გამოექცა. ისინი უკრაინაში სირიიდან ჩავიდნენ. სამწუხაროდ, ომს ჰასანის მამა შეეწირა.

ფოტო: Polícia Slovenskej republiky

"ოჯახი კვლავ ერთადაა. მათ ყველაფერი დაკარგეს, მაგრამ ამჯერად ომმა მათი ოჯახის წევრი არ წაიყვანა. ისინი ერთად არიან და ახლა მხოლოდ ესაა მნიშვნელოვანი", — ვკითხულობთ პოლიციის განცხადებაში.

ამავე თემაზე:

წუხანდელი ღამის მთავარი გმირია — 11 წლის უკრაინელი ბიჭი სლოვაკეთში მარტო ჩავიდა