ხურჩაში მომხდარი ინციდენტი, მდგომარეობა საოკუპაციო ხაზთან და ვარშავის ნატოს სამიტი - ეს ძირითადი საკითხებია, რომლებზეც დღეს, 30 მაისს, უშიშროების საბჭოს სხდომაზე ისაუბრეს. სხდომის დასრულების შემდეგ, უშიშროების საბჭოს მდივანმა, ირინა იმერლიშვილმა განმარტა, რომ პრეზიდენტმა შინაგან საქმეთა სამინისტროსა და უსაფრთხოების სამსახურს დაავალა, შეიმუშავონ გეგმა, რომ ევროკავშირის სადამკვირვებლო მისიასთან ერთად, საოკუპაციო ზოლის მიმდებარედ უსაფრთხოება და კონტროლი გაძლიერდეს.

ჟურნალისტის შეკითხვას, ხომ არ უსაუბრიათ საბჭოს სხდომაზე საოკუპაციო ხაზთან სპეცდანიშნულების წარმომადგენლების რაოდენობაზე, იმერლიშვილმა უპასუხა, რომ აღნიშნულ ტერიტორიაზე ზუსტად იმდენივე სამართლადამცავია მობილიზებული, რამდენიც აქამდე იყო.

იმერლიშვილმა ასევე განმარტა, რომ უშიშროების საბჭომ პრეზიდენტს რეკომენდაციით მიმართა, რომ ამ უკანასკნელმა პარლამენტს წარუდგინოს წინადადება იმის თაობაზე, რომ ცენტრალურ აფრიკაში საქართველომ თავისი კონტიგენტი გაზარდოს:

"ეროვნულმა უშიშროების საბჭომ რეკომენდაცია მისცა პრეზიდენტს, რომ პარლამენტს წარუდგინოს ცენტრალურ აფრიკაში კონტინგენტის გაზრდა ოცეულით. დღეს ცენტრალურ აფრიკაში 5 სამხედრო მოსამსახურე გვყავს, საუბარია 20-ზე. იმედი გვაქვს, პარლამენტი გაიზიარებს პრეზიდენტისა და ეროვნული უშიშროების საბჭოს რეკომენდაციას, თუმცა, რა თქმა უნდა, გადაწყვეტილება მასზეა".

უშიშროების საბჭოს სხდომაზე ასევე ისაუბრეს მოახლოებულ ნატოს ვარშავის სამიტზე. იმერლიშვილის თქმით, კონსულტაციებში აქტიურად არიან ჩართულები საგარეო და თავდაცვის უწყებები.