აუდიტორია 115-ის ლიდერებმა ლევან ლორთქიფანიძემ და ნათია ქარჩილაძემ თბილისის სახელმწიფო უნივერსიტეტში პრესკონფერენცია გამართეს, სადაც რექტორის მოვალეობის შემსრულებელთან, დარეჯან თვალთვაძესთან შეხვედრის დეტალებზე ისაუბრეს და მთავრობას მიმართეს.

ლორთქიფანიძის თქმით, ისინი რექტორის მოვალეობის შემსრულებელთან შეხვედრისას გაჟღერებულ მხოლოდ ერთ იდეას იზიარებენ, რომლის მიხედვითაც, თვალთვაძემ მთავრობას იმ კანონის მიღების დაჩქარებისკენ მოუწოდა, რომელიც თსუ-ს თვითმმართველობას სტატუსს განუსაზღვრავს.

"სასწრაფოდ შეასრულოს საქართველოს მთავრობამ და პრემიერმინისტრმა მოცემული დაპირება. უამრავი ჭორი და მართალი არსებობს, რომ ღიზიანდებიან ჩვენი აქ ყოფნით. შესაბამისად, თუ აქ რამე მოხდება, მთელი პასუხისმგებლობა დაეკისრება მთავრობას".

ლევან ლორთქიფანიძის თქმით, დარეჯან თვალთვაძემ მათ თვითმმართველობასთან მოლაპარაკების გამართვისკენ მოუწოდა, რასაც აუდიტორია 115 არ აპირებს:

"მათ 2-წლიანი ვადა უკვე გაუვიდათ და არ არიან ლეგიტიმური ორგანოები, არც კანონიერად და არც მორალურად, მათთან ჩვენ არცერთ თემაზე არ ვსაუბრობთ".

ამას გარდა, რექტორის მოვალეობის შემსრულებელმა მათ დაკავებული 303-ე და 213-ე აუდიტორიების დატოვებისკენ მოუწოდა, რის პასუხადაც ლევან ლორთქიფანიძემ განაცხადა, რომ თსუ-ს აუდიტორიების დეფიციტი აქვს და აღნიშნული აუდიტორიები სასწავლო აუდიტორიებად უნდა გადაკეთდეს.

ლევან ლორთქიფანიძის თქმით, ისინი მოლაპარაკებებზე მას შემდეგ წავლენ, რაც გასულ კვირაში მომხდარ ინციდენტში მონაწილე პირები დაისჯებიან.

303-ე და 213-ე აუდიტორიები თვითმმართველობას აქვს დათმობილი, თუმცა, აუდიტორია 115-მა პროტესტის ნიშნად აღნიშნული აუდიტორიები მას შემდეგ დაიკავა, რაც თსუ-ს პირველ კორპუსში მათსა და თსუს თვითმმართველობის წევრებს შორის ფიზიკური დაპირისპირება მოხდა.