24 თებერვალს რუსეთი უკრაინაში შეიჭრა და ომი წამოიწყო, რომელიც დღემდე გრძელდება. ომს ყოველდღიურად უკრაინელი ჯარისკაცების გარდა, მშვიდობიანი მოსახლეობის სიცოცხლეც ეწირება. თუმცა როგორც ჩანს, რუს ინფლუენსერებს უფრო დიდი სადარდებელი აქვთ — რუსეთში ინსტაგრამის დაბლოკვა.

ინსტაგრამის დაბლოკვა რუს ინფლუენსერებს განსაკუთრებულად ეწყინათ და უკმაყოფილების გამოსახატავად არც ვიდეოებსა თუ ფოტოებში ტირილი დავიწყებიათ. ისინი საყვარელ სოციალურ ქსელს ცრემლებით დაემშვიდობნენ და საკუთარი "უიღბლობის" გამოც ბევრი იწუწუნეს.

ერთ-ერთი ასეთი ინფლუენსერი ოლგა ბუზოვაა — 23 მილიონზე მეტი გამომწერით ინსტაგრამზე. მან ცოტა ხნის წინ თითქმის 7-წუთიანი ვიდეო დადო, რომელშიც გამომწერებს ემშვიდობება და საკუთარ ბედს მისტირის.

"არ მეშინია ვაღიარო, რომ თქვენი დაკარგვა არ მინდა...არ ვიცი, მომავალში რა იქნება...აქ ჩემს ცხოვრებას, სამუშაოსა და სულს გიზიარებდით. ეს უბრალოდ სამსახური კი არა, ჩემი სულის ნაწილია. მგონია, რომ გულის უდიდესი ნაწილი მომაგლიჯეს და მართმევენ", — ამბობს ოლგა ვიდეოში.

ოლგა ერთადერთი რუსი არაა, რომელმაც ახალი შეზღუდვების გამო ცრემლები ღვარა.

"გგონიათ, ჩემთვის, როგორც ინსტარამ ინფლუენსერისთვის ეს უბრალოდ შემოსავლის წყაროა? ეს ჩემი ცხოვრებაა, ჩემი სულია. მასთან ერთად ვიღვიძებ და ვიძინებ ბოლო ხუთი წელია", — ამბობს ერთ-ერთი ინფლუენსერი Nexta-ს მიერ გავრცელებულ ვიდეოში.

დანარჩენებმა ხალხს Telegram-სა და V Kontakte-ში მათი ანგარიშების გამოწერისაკენ მოუწოდეს. რუსეთში მცხოვრები ადამიანების ნაწილმა კი სოციალურ ქსელებში დაწერეს, რომ შეზღუდვისთვის გვერდის ასავლელად VPN-ის გადმოწერას აპირებდნენ.

რუსეთში ინსტაგრამი 14 მარტს დაიბლოკა. მანამდე რუსეთის გენერალურმა პროკურატურამ მოითხოვა კომანია Meta-ს, რომელიც მოიცავს Facebook-ს, Instagram-სა და WhatsApp-ს, ექსტრემისტულ ორგანიზაციად გამოცხადება და რუსეთში მისი საქმიანობის აკრძალვა.

გადაწყვეტილებას ინსტაგრამის ხელმძღვანელი ადამ მოსერიც გამოეხმაურა. მან ტვიტერზე დაწერა, რომ აღნიშნული გადაწყვეტილება რუსეთში მცხოვრებ 80 მილიონ რუსს ერთმანეთთან და მსოფლიოსთან კომუნიკაციას გაურთულებდა.