საგარეო საქმეთა მინისტრი დმიტრო კულება მიიჩნევს, რომ ევროსაბჭოს გადაწყვეტილება უკრაინასთან დაკავშირებით ნიშნავს "რევოლუციას" ევროკავშირთან დაახლოების საქმეში. თუმცა, კულებამ აღიარა, რომ სამიტის შედეგები საკმაოდ არაერთგვაროვანია, რადგან უკრაინას სურდა მიეღო კანდიდატის სტატუსის პოლიტიკური აღიარება ევროკავშირის ლიდერების ამ შეხვედრაზევე.

"თუმცა, თუ შევადარებთ ჩვენს მოლოდინებს სამი კვირის წინ, ის, რაც წუხელ მოხდა, არის რევოლუცია, რომელმაც ჩვენი ევროკავშირის წევრობა ლიანდაგებზე დააყენა. ჩვენ ლიანდაგზე დაგვაყენეს და ჩვენი მატარებელი წავიდა ევროკავშირისკენ", — ევროპეისკაია პრავდას ინფორმაციით, ამის შესახებ მინისტრმა ტელეეთერში განაცხადა.

კულებამ დასძინა, რომ ახლა დარწმუნებულია ევროკავშირში გაწევრიანების პროცესის წარმატებაში.

"დღეიდან ჩვენ, უკრაინელებმა, 100%-ით ვიცით, რომ გავხდებით ევროკავშირის წევრი. ერთადერთი საკითხია, როდის მოხდება ეს", — განაცხადა მან.

გამოცემის ინფორმაციით, მინისტრმა თავი შეიკავა პროგნოზირებისგან, როდის არის მოსალოდნელი შემდეგი ეტაპები.

ამ თემას უკვე გამოეხმაურა პრეზიდენტი ზელენსკიც და განაცხადა, რომ იციან ვინ დაუჭირა ვერსალში, ევროკავშირის ლიდერების შეხვედრაზე მათ მხარი და "ვინ იყო ჩუმად".

ვერსალში შეხვედრის შემდეგ, სახელმწიფოს წარმომადგენლებმა ერთობლივი განცხადება გამოაქვეყნეს, სადაც ნათქვამია, რომ ევროპულმა საბჭომ "აღიარა უკრაინის ევროპული მისწრაფებები". ამასთან, ლიდერები შეთანხმდნენ, მხარი დაუჭირონ უკრაინას "ევროინტეგრაციის გზაზე".

"2022 წლის 28 თებერვალს, უკრაინის პრეზიდენტმა, უკრაინის მიერ საკუთარი ბედის არჩევის უფლების განხორციელებისას, უკრაინის ევროკავშირში გაწევრიანების შესახებ განაცხადი წარადგინა. საბჭომ სწრაფად იმოქმედა და შესთავაზა ევროკომისიას, წარმოედგინა თავისი მოსაზრება ამ განცხადებასთან დაკავშირებით ევროკავშირის ფუძემდებლური შეთანხმებების შესაბამისი დებულებების გათვალისწინებით. ამის მოლოდინში და დაუყოვნებლად, კიდევ უფრო გავაძლიერებთ ჩვენს კავშირებს და გავაღრმავებთ პარტნიორობას, რათა მხარი დავუჭიროთ უკრაინას ევროპული გზის გასაგრძელებლად", — ნათქვამია განცხადებაში.

განცხადებაში დაკონკრეტებული არ არის არანაირი თარიღი, როდის მიიღებს უკრაინა კანდიდატი წევრის სტატუსს. შეხვედრამდე ნიდერლანდების პრემიერმინისტრმა, მარკ რუტემ განაცხადა, რომ ევროკავშირში გაწევრიანების სწრაფი პროცედურა არ არსებობს. რუტემ აღნიშნა, რომ კომისიებს წევრობის განაცხადის შეფასება ევალებათ, რაც შემდეგ საბჭომ მხედველობაში უნდა მიიღოს, თუმცა ამას შესაძლოა, თვეები, ან წელიწადიც დასჭირდეს. შეხვედრის შემდეგ კი ლიეტუვის პრეზიდენტმა, გიტანას ნაუსედამ განაცხადა, რომ მწვავე დისკუსიის შემდეგ, ევროკავშირის ლიდერებმა უთხრეს დიახ უკრაინის ევროინტეგრაციას. მისი თქმით, პროცესი დაიწყო.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში