ნიდერლანდების პრემიერმინისტრის, მარკ რუტეს განცხადებით, ევროკავშირში გაწევრიანების სწრაფი პროცედურა არ არსებობს. ამის შესახებ მან ვერსალში შეხვედრამდე განაცხადა. რუტე დასძენს, რომ ეს ხანგრძლივი პროცესი იქნება.

"მნიშვნელოვანია, რომ უკრაინამ ევროკავშირის წევრობა მოითხოვა [...] არ არსებობს სწრაფო პროცედურა, რათა ევროკავშირის წევრი გახდე", — განაცხადა მან.

მისივე თქმით, ნიდერლანდები იყო ერთ-ერთი პირველი, ვინც უკრაინას სამხედრო დახმარება გაუწია და რუსეთის წინააღმდეგ მძიმე სანქციები მოითხოვა. რუტე აღნიშნავს, რომ კომისიებს წევრობის განაცხადის შეფასება ევალებათ, რაც შემდეგ საბჭომ მხედველობაში უნდა მიიღოს, თუმცა ამას შესაძლოა, თვეები, ან წელიწადიც დასჭირდეს.

ნიდერლანდების პრემიერმინისტრი ამბობს იმასაც, რომ ახლა აქცენტი ახლო მომავალზე უნდა გაკეთდეს, იმაზე, თუ რისი გაკეთებაა შესაძლებელი უკრაინასა და ევროკავშირს შორის ურთიერთობის გასაღრმავებლად.

უკრაინის პრეზიდენტმა, ვოლოდიმირ ზელენსკიმ ქვეყნის ევროკავშირში გაწევრიანების მოთხოვნას ხელი 28 თებერვალს მოაწერა. პირველ მარტს კი ევროპარლამენტმა მიიღო რეზოლუცია, რომელიც უმკაცრესად გმობს რუსეთის უკანონო შეჭრას უკრაინაში და მხარს უჭერს უკრაინისთვის ევროკავშირის კანდიდატის სტატუსის მინიჭებას.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში