საქართველოს პროკურატურის განცხადებით, ჰააგის სასამართლოში საქართველომ 2008 წლის ომის საქმეზე კიდევ ერთ დიდ წარმატებას მიაღწია. უწყების თქმით, საქმეზე სისხლის სამართლის საერთაშორისო სასამართლოში საქართველოს პოზიციის დამადასტურებელ მტკიცებულებების მოპოვებაში სხვა უწყებებთან ერთად აქტიურად არიან ჩართულები.

უწყებაში ამბობენ, რომ ქართული მხარის მიერ გამოძიებით მოპოვებული სამართლებრივი არგუმენტები ჰააგის სასამართლოში აქვთ გაგზავნილი. პროკურატურაში აღნიშნავენ იმასაც, რომ მათთან ერთად ამ გამარჯვებაში დიდია იუსტიციის, საგარეო საქმეთა და თავდაცვის სამინისტროებისა და სახელმწიფო უსაფრთხოების სამსახურის როლი.

"ხსენებული მტკიცებულებების შეგროვებისა და სახელმწიფო პოზიციების შემუშავების პროცესში საქართველოს გენერალურ პროკურატურას სხვა უწყებებთან ერთად მნიშვნელოვანი წვლილი მიუძღვის. როგორც საერთაშორისო სასამართლოს პროკურორის განცხადებაშია ნათქვამი, პროკურორის სტანდარტების შესაბამისად, 2008 წლის აგვისტოს ომის საქმეზე გამოძიება ყველა ეტაპზე მიმდინარეობდა დამოუკიდებლად, მიუკერძოებლად და ობიექტურად და ხელმძღვანელობდა მხოლოდ მოპოვებული მტკიცებულებებითა და რომის სტატუსით განსაზღვრული ვალდებულებებით", — აღნიშნავენ ისინი.

რაც შეეხება იუსტიციის სამინისტროს, სასამართლოს გადაწყვეტილებას ისინიც საქართველოს მიერ საერთაშორისო სასამართლოებში მიღწეულ მორიგ გამარჯვებად აფასებენ.

"ამ გადაწყვეტილებით კიდევ ერთხელ დასტურდება, რომ საქართველოს მოსახლეობის მიმართ აგვისტოს ომის დროს ჩადენილი მძიმე დარღვევები შეერაცხება რუსეთის ფედერაციისა და სეპარატისტული რეჟიმების კონკრეტულ წარმომადგენლებს", — ნათქვამია განცხადებაში.

უწყების თქმით, 2016 წლიდან საქართველოს მთავრობა იუსტიციის სამინისტროსთან კოორდინაციით ჰააგის სასამართლოს პროკურორის ოფისთან აქტიურად თანამშრომლობდა და სრულყოფილ ინფორმაციასა და მტკიცებულებებს აწვდიდა.

"ჰააგის სასამართლოს პროკურორის ოფისის ახლანდელი გადაწყვეტილება საქართველოს მთავრობის მიერ ზემოაღნიშნული მტკიცებულებების წარდგენის შედეგი და სტრასბურგის ისტორიული გამარჯვების ლოგიკური გაგრძელებაა. საქართველოს მთავრობა გააგრძელებს აქტიურ თანამშრომლობას ჰააგის სასამართლოსთან, რათა საქართველოს მოსახლეობის მიმართ ჩადენილ ყველა სხვა დანაშაულზე აღსრულდეს საერთაშორისო მართლმსაჯულება", — ნათქვამია განცხადებაში.

გარდა ამისა, სამინისტროში განმარტავენ, რომ რომის სტატუსის ყველა წევრ სახელმწიფოს ჰააგის სასამართლოსთან პირის დაკავებისა და სასამართლოსთვის გადაცემის კუთხით თანამშრომლობის ვალდებულება აქვს და საქართველო ამას სრულად შეასრულებს.

"აგვისტოს ომის საქმეზე სტრასბურგის სასამართლოს 2021 წლის 21 იანვრის ისტორიულ გადაწყვეტილებასთან ერთად, ჰააგის სასამართლოს ეს გადაწყვეტილება წარმოადგენს საერთაშორისო სასამართლოებში ქართული მხარის კიდევ ერთ მნიშვნელოვან გამარჯვებას რუსეთის ფედერაციის წინააღმდეგ და ადასტურებს, რომ 2008 წლის ომის დროს ქართველი სამხედროები მოქმედებდნენ საერთაშორისო სამართლის ნორმების დაცვით", — აღნიშნავენ უწყებაში.

ჰააგის სისხლის სამართლის საერთაშორისო სასამართლომ აგვისტოს ომის საქმეზე დაკავების სამი ორდერი გასცა. ICC-ის პროკურორის კარიმ ხანის განცხადებით, ორდერები გაიცემა შემდეგ მაღალჩინოსნებზე:

• გენერალ-ლეიტენანტი მიხაილ მინძაევი, რომელიც 2005 წელს დე ფაქტო სამხრეთ ოსეთის ადმინისტრაციის შინაგან საქმეთა მინისტრად დაინიშნა, თანამდებობაზე იყო 2008 წლის31 ოქტომბრამდე;
• გამლეტ გუჩმაზოვი, რომელიც აგვისტოს მოვლენების დროს სამხრეთ ოსეთის დე ფაქტო შინაგან საქმეთა სამინისტროს წინასწარი დაკავების იზოლატორის უფროსი იყო;
• დავიდ სანაკოევი, სამხრეთ ოსეთის პრეზიდენტის დე ფაქტო წარმომადგენელი ადამიანის უფლებათა საკითხებში.

პროკურორის თქმით, აქვს დასაბუთებული საფუძველი ივარაუდოს, რომ ეს სამი პირი ეკისრება სისხლის სამართლის პასუხისმგებლობას 2008 წლის 8-დან 27 აგვისტოს ჩათვლით სამხრეთ ოსეთის ტერიტორიაზე და მის გარშემო ჩადენილი სამხედრო დანაშაულებისთვის.

მისი განცხადებით, დაკავების ორდერები კონკრეტულად ეხება უკანონო პატიმრობებს, არასათანადო მოპყრობას, მძევლების აყვანას და შემდგომში ეთნიკურად ქართველი მშვიდობიანი მოქალაქეების უკანონო გადაყვანას.