სულ ცოტა ხნის წინ მთელი ინტერნეტსივრცე მოიცვა 4 წლის ვალერის ვიდეომ, რომელიც პატარა პარკით ხელში გულმოსაკლავად მოაბიჯებდა გზაზე. ვიდეო ვირუსულად გავრცელდა და ბავშვის ბედით ბევრი დაინტერესდა.

მედიაში გავრცელებული ინფორმაციის მიხედვით, ატირებულმა პატარამ უკრაინა-პოლონეთის საზღვარი მარტომ გადაკვეთა. თუმცა, პოლონეთის სასაზღვრო დაცვის სამსახურის ცნობით, ეს მცდარი ინფორმაციაა, რადგან ვალერის თან ოჯახი ახლდა.

"გვსურს, გაცნობოთ, რომ მედიაში, სამწუხაროდ, მცდარი ინფორმაცია გავრცელდა. 4 წლის ვალერიმ საზღვარი მარტომ არ გადაკვეთა, მას თან ოჯახი ახლდა. საზღვარზე ჩვენმა ოფიცრებმა იგი ტკბილეულითაც დაასაჩუქრეს. ამჟამად ის და მისი ოჯახი პოლონეთში უკვე უსაფრთხოდ არიან".

ვალერი რომ ახლა უკეთ გრძნობს თავს, ეს სამსახურის გავრცელებულ ფოტოზეც ჩანს, სადაც პატარა კვლავაც თავისი პარკით, თუმცა, უკვე გაღიმებული მოაბიჯებს.

ამის მიუხედავად, უკრაინელი ლტოლვილების საკითხი კვლავაც პრობლემური და გადაუდებელია. გაეროს 3 მარტის ცნობით, რუსეთის უკრაინაში შეჭრის შემდეგ შექმნილი საომარი სიტუაციის გამო ქვეყანა უკვე 1,2 მილიონზე მეტმა ადამიანმა დატოვა. ლტოლვილების ნახევარზე მეტი, 53,7 პროცენტი პოლონეთში გადავიდა, დანარჩენებმა კი სხვა მეზობელ ქვეყნებს: სლოვაკეთს, მოლდოვას, რუმინეთსა და უნგრეთს შეაფარეს თავი.

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში

ასევე იხილეთ: