კიევის ტარას შევჩენკოს ეროვნული უნივერსიტეტი აჭარის მთავრობის თავმჯდომარესთან დაკავშირებით განცხადებას ავრცელებს და აღნიშნავს, რომ თორნიკე რიჟვაძეს იქ დიპლომი არ მიუღია, რადგან 2017 წელს ოჯახური გარემოებების გამო უნივერსიტეტიდან საკუთარი ნებით გარიცხეს. უნივერსიტეტმა განცხადება მას შემდეგ გამოაქვეყნა, რაც რიჟვაძემ პირდაპირ არ უპასუხა კითხვას, ვინ დაიწყო უკრაინაში ომი.

"ამ შეტყობინებით გაცნობებთ ბიოგრაფიულ ინფორმაციაში უზუსტობის შესახებ. კერძოდ, თორნიკე რიჟვაძეს, დაბადებულს 1989 წელს, აჭარის მთავრობის თავმჯდომარეს, არ მიუღია კიევის ტარას შევჩენკოს სახელობის სახელმწიფო უნივერსიტეტის დიპლომი.

2015 წელს ჩააბარა კიევის ტარას შევჩენკოს ეროვნული უნივერსიტეტის საერთაშორისო ურთიერთობების ინსტიტუტის ასპირანტურის პროგრამაზე და 2017 წელს ოჯახური გარემოების გამო ნებაყოფლობით იქნა გარიცხული.

ამრიგად, სწავლის ეს პერიოდი არ დასრულებულა სამეცნიერო ხარისხისა და კვალიფიკაციის მიღებით, რადგან სწავლა შეწყდა. ძალიან ვწუხვართ, რომ მას, როგორც ჩვენს ყოფილ სტუდენტს, უკრაინა არ შეუყვარდა", — ვკითხულობთ განცხადებაში.

აჭარის მთავრობის ოფიციალურ გვერდზე თორნიკე რიჟვაძის ბიოგრაფიაში იძებნება, რომ ის 2015 წლიდან დღემდე განათლებას იღებს ტარას შევჩენკოს სახელობის კიევის სახელმწიფო უნივერსიტეტში.

7 მარტს აჭარის მთავრობის თავმჯდომარემ და ქართული ოცნების პოლიტსაბჭოს წევრმა, თორნიკე რიჟვაძემ პირდაპირ არ უპასუხა კითხვას, ვინ დაიწყო ომი უკრაინაში და თქვა, რომ ამისთვის ჟურნალისტებმა საერთაშორისო სასამართლოს უნდა მიმართონ.

დამატებითი ინფორმაცია უკრაინაში მიმდინარე მოვლენებზე განახლებად რეჟიმში შეგიძლიათ ნახოთ აქ:

იმისთვის, რომ არ გამოგრჩეთ უკრაინაში მიმდინარე პროცესებთან დაკავშირებული სიახლეები, შემოგვიერთდით ჯგუფში — რა ხდება უკრაინაში