ბაიდენის ადმინისტრაცია მზად არის რუსული ნავთობის იმპორტზე ემბარგო ევროპელი მოკავშირეების გარეშე დღესვე დააწესოს — ამის შესახებ ინფორმაციას Bloomberg წყაროზე დაყრდნობით ავრცელებს. გამოცემის ინფორმაციით, აღნიშნულ სანქციებში მონაწილეობას დიდი ბრიტანეთიც მიიღებს.

როგორც გამოცემა წერს, აკრძალავა რუსულ ნავთობს, თხევად ბუნებრივ გაზსა და ნახშირზე გავრცელდება. გადაწყვეტილება მიღებულ იქნა ევროპელ მოკავშირეებთან კონსულტაციების შედეგად — უყვება წყარო Bloomberg-ს.

აღსანიშნავია, რომ აქამდე რუსულ გაზსა და ნავთობზე სანქციები ძირითადად არ ვრცელდებოდა, რაც ევროპის ქვეყნების რუსულ ენერგორესურსებზე დამოკიდებულებით იხსნებოდა.

კვირას აშშ-ის სახელმწიფო მდივანმა, ენტონი ბლინკენმა გააკეთა განცხადება, სადაც ის ამბობდა, რომ შეერთებული შტატები და ევროპელი მოკავშირეები რუსული ნავთობის იმპორტზე ემბარგოს დაწესებას განიხილავენ.

ორშაბათს თეთრ სახლში ითქვა, რომ გადაწყვეტილება მიღებული არ არის.

აშშ-ის ენერგეტიკული სააგენტოს ინფორმაციით, გასულ წელს აშშ-ში იმპორტირებული ნედლი ნავთობის მხოლო 3% იყო რუსული. მთლიანობაში რუსული ნავთობისა და ნავთობპროდუქტების იმპორტმა აშშ-ში 8%-იანი წილი დაიკავა.

Bloomberg წერს, რომ ევროპის ქვეყნები, რომლებიც რუსულ ენერგორესურსებზე უფრო მეტად არიან დამოკიდებულნი, ჯერჯერობით თავს არიდებენ რუსულ ნავთობზე აკრძალვის დაწესებას, თუმცა კომპანიებზე, რომლებიც რუსული ენერგიის ექსპორტს ახორციელებენ, ზეწოლა იზრდება.

აღსანიშნავია, რომ გუშინ ბარელი ნავთობის ღირებულება 140 დოლარს მიუახლოვდა. Brent ტიპის ნავთობის ფასი ამჟამად ბარელზე დაახლოებით 129 დოლარია.

თუკი როგორც საქართველოს, ასევე მსოფლიო ეკონომიკის მნიშვნელოვანი ცვლილებებით ხარ დაინტერესებული, მაშინ შემოგვიერთდი ჩვენს ეკონომიკის ჯგუფში.

გაიგეთ მეტი: