რადიო თავისუფლება (RFE/RL) რუსეთში საქმიანობას დროებით აჩერებს. ორგანიზაციაში განმარტავენ, რომ გადაწყვეტილება არა თავისი სურვილით, არამედ პუტინის რეჟიმის მიერ სიმართლეზე თავდასხმის გამო მიიღეს.

4 მარტს რუსულმა საგადასახადო ორგანოებმა რადიო თავისუფლების რუსული ბიუროს გაკოტრების პროცესი წამოიწყეს. RFE/RL-ის განცხადებით, კრემლის თავდასხმები მათ წინააღმდეგ წარმართული მრავალწლიანი კამპანიის კულმინაციაა.

გარდა ამისა, ქვეყანაში მიიღეს კანონი, რომელიც პატიმრობის საფრთხეს უქმნის ყველა ჟურნალისტს, ვინც გაბედავს და გადაუხვევს კრემლის მოსაზრებებს უკრაინაში ომის შესახებ. ვინაიდან რადიო თავისუფლების ჟურნალისტები ავრცელებენ სიმართლეს ომზე, კომპანია გეგმავს ამ მოვლენების გაშუქებას რუსეთის ფარგლებს გარეთ.

რადიო თავისუფლების პრეზიდენტმა და აღმასრულებელმა დირექტორმა ჯეიმი ფლაიმ განაცხადა, რომ გამოიყენებენ ყველა შესაძლო პლატფორმას, რათა იმ დროს, როდესაც რუსეთში ყველაზე მეტად სჭირდებათ ჟურნალისტიკა, ხმა მიაწვდინონ.

"მიუხედავად ამ საშინელი მომენტისა, ჩვენი ორგანიზაციის 70-წლიანი ისტორიიდან ვიცით, რომ ერთხელაც, ალბათ, იმაზე ადრე ვიდრე ბევრი ფიქრობს, ჩვენ შევძლებთ ხელახლა გავხსნათ ოფისი რუსეთში. დრო თავისუფლების მხარეზეა, თუნდაც პუტინის რუსეთში", — განაცხადა მან.

სახელმწიფო დუმამ ერთხმად და დაუყოვნებლივ, სამი მოსმენით მიიღო და პუტინმა დაამტკიცა კანონპროექტი, რომელიც რუსი სამხედროების ქმედებების შესახებ "ცრუ" ინფორმაციის გავრცელებაზე სასჯელს აწესებს. BBC-ის რუსული ბიუროს განმარტებით, რუსეთის დუმის სათათბირომ მიიღო კანონი, რომლის მიხედვითაც რუსეთის შეიარაღებული ძალების ქმედებების შესახებ "ცრუ" ინფორმაციის გავრცელებაში პასუხისმგებელ პირებს სამ წლამდე თავისუფლების აღკვეთა ემუქრებათ. თუ ეს "ყალბი" ინფორმაცია გავრცელდა ორგანიზებული ჯგუფის მიერ, ან თან ახლდა "მტკიცებულებების გაყალბება", მაქსიმალური სასჯელი 10 წლამდე იზრდება. ხოლო თუ "არასანდო" ინფორმაციის გავრცელებამ სერიოზული შედეგები გამოიწვია, "დამნაშავეებს" 15 წლამდე თავისუფლების აღკვეთა ემუქრებათ.

მანამდე როსკომნადზორმა განაცხადა, რომ რუსული მედია სამხედრო ოპერაციებს მხოლოდ ოფიციალური რუსული წყაროებიდან მიღებული ინფორმაციის საფუძველზე უნდა აშუქებდეს. მათ მედიისგან მოითხოვეს სტატიების წაშლა, რომლებშიც უკრაინაში მომხდარს "ომს" ან "თავდასხმას" უწოდებდნენ. შემდეგ კი დაბლოკეს რამდენიმე დამოუკიდებელი მედია საშუალება და სოციალური ქსელები.